Zyrtarë të shërbimit sekret në Shtetet e Bashkuara po hetojnë mundësinë që qeveria ruse po përpiqet të ndikojë zgjedhjet amerikane. Kështu bëhet e ditur në një raport të ri, që publikohet në median ndërkombëtare.
Drejtori i shërbimit kombëtar të inteligjencës, James Clapper kryeson hetimin që ka të bëjë me faktin nëse dhe si zyrtarët rusë mund të përpiqen të ndikojnë mbi zgjedhjet dhe të “furnizojnë propagandë për të sulmuar demokracinë amerikane – e politikat themeltare në të gjithë botën”. Lajmin e bën të ditur gazeta prestigjioze “The Washington Post”.
Zyrtarët që folën për gazetën në kushtet e anonimatit thanë se nuk ka asnjë konfirmim për ndonjë plan të zbatuar tashmë apo ndonjë sulm të planifikuar, por sipas njërit prej tyre “madje edhe hija më e vogël e ndonjë gjëje që mund të ndikojë në sigurinë e sistemit të zgjedhjeve do të ishte një shqetësim madhor”. I njëjti burim shtoi se është thelbësore për Demokracinë që njerëzit të kenë besim tek sistemi elektoral.
Mjaft zyrtarë pohuan për “Post” se nëse provohen se ka të tilla, përpjekjet ruse për të sabotuar mund të mos synojnë manipulimin e zgjedhjeve në njërin apo kahun tjetër, por më së shumti do të synojnë promovimin e kaosit dhe të mosbesimit që mund t’i bëjë Shtetet e Bashkuara të duken më pak të besueshme në marrëdhëniet ndërkombëtare, me gjasa edhe të reduktojnë autoritetin amerikan. Uashingtoni dhe Moska janë angazhuar në bisedime, së fundmi, për konfliktin sirian gjatë samitit të G20 në Kinë.
Hetimi i shërbimeve sekrete vjen vetëm pak muaj pasi 20 mijë email-e të komitetit kombëtar të demokratëve u publikuan nga WikiLeaks në një incident hakerimi që iu faturua shërbimeve sekrete ruse. Ka raportime që sugjerojnë se zyrtarët amerikanë dyshojnë se administrata e Vladimir Putin ishte e përfshirë në hakerimin e dokumenteve, por një zyrtar i lartë amerikan tha për gazetën londineze “The Guardian” se nuk mund t’ia atribuojnë pa asnjë dyshim sulmin një faktori në shtetin rus.
Rreth së njëjtës kohë me hakerimin e dokumenteve të demokratëve, edhe sistemet e regjistrimit të votuesve në Arizona dhe Ilinois u infiltruan gjithashtu nga hakerat, duke ngritur dyshime se sabotazhet kibernetike mund të sjellin dëmtime të paprecedent në zgjedhjet amerikane. Makineri të kompromentuara, që prodhojnë balanca të gabuara të votimit do të ngrinin dyshime serioze për integritetin e procesit politik.
“Administratorët e zgjedhjeve janë të trajnuar të drejtojnë zgjedhjet, jo të mbrojnë sistemet kompjuterike”, thotë Joe Hall, shef i teknologjisë në qendrën për Demokraci dhe Teknologjinë me seli në Uashington. “Sistemet e votimit që ne përdorim në mjaft raste nuk mbajnë llojin e provave që dikush do të donte të kishte për të diktuar një sulm, e jo më të rikuperojnë të dhëna nga sistemi pa problem dhe humbje votash”.
Javën e shkuar, lideri i pakicës në Senat, Harry Reid i dërgoi një letër FBI-së ku i kërkonte drejtorit James Comey të hetonte mundësinë e infiltrimit të zgjedhjeve nga Kremlini. “Së fundmi, kam qenë i shqetësuar se kërcënimi i ndërhyrjes së qeverisë ruse në zgjedhjet tona presidenciale është më i madh nga sa e kemi ditur më parë dhe mund të përfshijë edhe qëllimin e falsifikimit të rezultatit zyrtar të zgjedhjeve”, shkroi Reid.
Ka një shqetësim dypalësh në lidhje me problemet e mundshme. Në një deklaratë, senatori republikan nga Nebraska Bob Sasse i kërkoi presidentit të deklarojë hapur emrin e qeverisë ruse si palë përgjegjëse për sulmin ndaj dokumenteve të demokratëve, në muajin korrik.
“Zgjedhjet e lira dhe legjitime janë të panegociueshme. Eshtë e qartë se Rusia mendon se vlera e ndërhyrjes tejkalon të gjitha pasojat”, tha Sasse. “Kjo llogari duhet të ndryshojë”.
Përgatiti: Juli Prifti – /tesheshi.com/
