Qendra Kërkimore për Politika të Sigurisë (SPRC) ka identifikuar faktorët që ndikojnë në radikalizëm dhe përhapje të ideologjisë së ekstremizmit të dhunshëm.
Në raportin e publikuar sot “Faktorët ndikues në radikalizim dhe ekstremizëm të dhunshëm: mësimet nga Peja, Mitrovica, Gjilani, Ferizaj dhe Kaçaniku”, Burim Ramadani nga SPRC dhe Xhabir Hamiti, profesor i studimeve islame, kanë prezantuar gjetjet dhe rekomandimet e Raportit Hulumtues, pas aktiviteteve disamujore në komunat Pejë, Mitrovicë, Gjilan, Ferizaj dhe Kaçanik.
Burim Ramdani nga SPRCtha se propaganda nëpër kanale të ndryshme ka ndikuar që tek të rinjtë e Kosovës të përhapet ideologjia e ekstremizmit të dhunshëm dhe radikalizmit.
“Janë 19 faktorë që i kemi identifiku që kanë ndikuar në radikalizim dhe ekstremizëm të dhunshëm të cilat i kemi ndarë në 4 grupime. Propaganda dhe rrjetet sociale si pjesë që këta të rinj e kanë marrë si informues për veti, kanë ndikuar më së shumti që ata të bien pre e saj”, tha ai.
Ramadani shtoi se gjetja kryesore e këtij raporti është se parandalimi i ekstremizimit të dhunshëm bëhet në komunitet dhe jo larg komunitetit.
Kurse Xhabir Hamiti, profesor i Studimeve islame, tha se një prej të gjeturave kryesore në këtë hulumtim është keqinformimi apo mosinformimi i drejtë për atë se çfarë po ndodh në Siri dhe Irak.
“Një prej të gjeturave kryesore është keqinformimi apo mosinformimi i drejtë për atë se qfarë po ndodh në Siri apo Irak, në luftërat që po zhvillohen atje. Ndjenja e izolimit po ashtu ka ndikuar, pasi një pjesë e të rinjvë nuk kanë pasur mundësi ta shohin botën ndryshe”, theksoi Hamiti.
Në këtë raport rekomandohet që qeveria të vendos në prioritet buxhetor zbatimin e Strategjisë për Parandalimin e Ekstremizmit të Dhunshëm dhe Radikalizmit që Shpie në Terrorizëm 2015-2020 dhe Planin e Veprimit. /tesheshi.com/
