Nga Mensur Krasniqi
Të kryesosh është sukses dhe krenari, por kjo nuk vlen për Maqedoninë dhe Shqipërinë pas publikimit të të dhënave nga Qendra e pavarur kërkimore “Numbeo”, ku Maqedonia kryeson për nga indeksi i ndotjes së ajrit, duke lënë pas 37 shtete të Evropës. Pas Maqedonisë, vijnë Monako dhe Shqipëria.
Ky fakt nuk e befason as Lëvizjen EcoGuerilla, meqë Tetova si qytet më i ndotur në Maqedoni, për një kohë të gjatë ka qenë në top 3-she të Numbeos, diku midis Katmandu në Nepal dhe qytetit Akra në Gana.
Kryetari i kësaj Lëvizje, Arijanit Xhaferi, akuzon kryeministrin Nikolla Gruevski, dhe ministrin e ekologjise Nuran Izairi, por edhe të gjithë deputetët shqiptarë e maqedonas, që janë zgjedhur me votat e tetovarëve, e që lejojnë një gjë e tillë të ndodhë.
“BilanCi i kësaj familje paguhet rëndë nga familjet tetovare të cilët duhet të përballen me ngritje prej 80 përqind të kancerit në 3 vite, me rritjen e trefishtë të fëmijëve që vuajnë nga astma dhe sëmundje tjera respiratore, nga mbi 7500 çifte që vuajnë sterilitetin, nga shumë e shumë të tjerë që cdo ditë pësojnë lloj-lloj sulmesh kardiake, psiqike, etj“, shprehet Xhaferi.
EcoGuerilla në disa raste i ka kërkuar qeverisë së Maqedonisë, me të edhe ministrit Izairi, deputetëve tonë, por edhe Avokatit të Popullit që të bëjnë punën e tyre në mbrojtjen e mjedisit dhe shëndetit të qytetarëve.
Në rrethinën e Tetovës punon një fabrikë e metalurgjisë së rëndë e njohur si JUGOHROM, e cila nuk ka kurrfarë filtrash ekologjikë, dhe që emeton në ajër 80 tonë pluhur çdo ditë. Kjo ka ndodh që në Tetovë të ketë ndotje edhe 20 herë më e lartë nga ajo që është e lejuar, sqaron EcoGuerilla.
Ndër të tjera, ashtu siç thonë nga kjo lëvizje, kërkesat e tyre kanë qenë: vendosja e filtrave ekologjik në Jugohrom dhe fabrikat tjera që ndotin në gjithë vendin; në rast nevoje të bëhet nga buxheti i shtetit edhe subvencionimi i këtyre filtrave; një angazhim më i madh në mbrojtjen e mjedisit; zhvendosja e deponive nga afër qytetit të Tetovës; organizimi i transportit publik të qytetit; ndërtimi i hapësirave të gjelbërta, etj.
Ashtu sic thuhet, sipas Xhaferit, çdo kërkesë e tyre është e drejtë elementare e qytetarit, por edhe e drejtë kushtetuese e cila po shkilet nga ndotësit, me amin të qeverisë përpara hundës së Avokatit të Popullit.
“Prandaj ky trekëndësh i të keqes nuk do t’ia dijë për mijëra njerëz që helmohen çdo vit, dhe vazhdon t’i japë afate tjera ndotësve që të helmojnë sa më shumë njerëz duke u munduar të mbushin xhepat e tyre pafund”, thotë Xhaferi.
Sipas tij, po shfaqen dyshime se mund të ketë dhe afera korruptive të cilat do duhej të hetohen nga një prokuror i caktuar.
Nga ana tjetër qytetarët nuk e njohin fuqinë e tyre të vërtetë dhe nuk ka ndodhur deri tani që këtyre personave (deputetëve, ministrave, etj), t’ju kërkohet përgjegjësi personale se çfarë po bëhet dhe pse po tolerohet Jugohromi të bëjë si të dojë. /tesheshi.com/
