Al Jazeera flet për një raport të përbashkët të Këshillit për Marrëdhëniet Amerikano-Islame (CAIR) dhe Universitetit të Kalifornisë, ku vihet në dukje se mes viteve 2008-2013 janë shpenzuar nga organizata të ndryshme më shumë se 200 milionë dollarë për nxitjen e frikës dhe urrejtjes ndaj muslimanëve në SHBA.
Ky raport bën fjalë për 74 grupe të çdo lloji, qoftë kristiane, sioniste, feministe, apo organesh lajmesh, që kanë financuar apo kanë ushqyer islamofobinë.
“Eshtë në vetvete një industri e tërë,” i ka thënë Al Jazeera-s një zëdhënës i CAIR-it, Wilfredo Amr Ruiz.
“Ka njerëz që bëjnë miliona dollarë në vit duke nxitur islamofobinë. Ata shpesh e paraqesin veten si ekspertë të çështjeve islame, kur nuk janë të tillë.”
“Ata kanë inkurajuar një atmosferë mosbesimi midis publikut amerikan, duke deklaruar se muslimanët nuk i përkasin komunitetit amerikan, e se kurrë nuk mund të jenë qytetarë besnikë.”
Dy janë rreziqet kryesore të islamofobisë, sipas Ruiz-it: rritja e krimeve për shkak të urrejtjes dhe legjislacioni antiislam.
Dhe zëdhënësi i CAIR-it jep dy shembuj. “Vetëm në vitin e fundit,” thotë ai, “ka një rritje me 500 për qind të krimeve për shkak të urrejtjes ndaj muslimanëve. Xhamitë janë vandalizuar, e ka një numër kërcënimesh me bombë ndaj grupeve islame.”
Gjithashtu, në kuadër të rrezikut të dytë, ai sjell faktin se, “Qeveria e Floridës po përpiqet madje t’i ndalojë librat shkollorë që të kenë referenca mbi Islamin në histori.”
Që prej tre vitesh, nga 2013-ta, ka shtim të numrit të projektligjeve apo amendamenteve, diku te 81, të hartuara për t’i “denigruar praktikat fetare islame,” me 80 prej tyre të paraqitura nga republikanët.
Në raport citohet senatori i Floridës, Alan Hayes, që ka shpërndarë literaturë ku thuhet: “Mënyra jonë fetare, politike dhe paqësore e jetesës është nën sulm nga Islami dhe nga ligji i sheriatit. Shpëtojeni brezin tim nga kjo ideologji që po e pushton vendin tonë…”
Drejtoresha ekzekutive e Institutit për Mirëkuptim dhe Politikë Sociale, Meira Neggaz, ka vënë në pah për Al Jazeera-n se rritja e ndjenjës antiislame ishte më tepër e lidhur me retorikën politike, sesa me ngjarje terroriste.
“2008-ta dhe 2012-ta, vite fushatash elektorale, kanë dëshmuar maja të islamofobisë, që nuk kishin të bënin aspak me terrorin. Dhe tani po shohim tendenca të ngjashme në këtë cikël elektoral.”
Ajo thekson se islamofobia është një kërcënim për demokracinë amerikane dhe i prek të gjithë banorët e vendit.
“Diskriminimi fetar është i paligjshëm. Duhet të ketë procedura ligjore që ta trajtojnë këtë.” /tesheshi.com/
