Raporti i Pew: Amerika do të mbetet një komb emigrantësh, trendi favorizon aziatikët

Aziatikët së shpejti do të jenë grupimi më i madh i emigrantëve në Shtetet e Bashkuara, duke e marrë këtë vend nga hispanikët. Këta të fundit po vijnë në Amerikë më pak nga sa mbërrinin 50 vjet më parë. Ndërkohë, përqindja e totalit të popullsisë së Shteteve të Bashkuara që kanë lindur jashtë vendit, ka qenë më e madhe në vitin 1890 sesa në ditët e sotme.

Këto janë disa nga shifrat e një raporti të publikuar nga qendra kërkimore Pew.

Shifrat dalin në një kohë që politikanët amerikanë dhe kandidatët për president po dërrmojnë njëri-tjetrin me argumente e fyerje për emigracionin. Raporti i plotë prej 130 faqesh përmban një analizë asnjëanëse që eksploron trendin e emigrimit dhe projektet që rezervon e ardhmja.

I titulluar “Vala moderne e emigracionit sjell 59 milionë njerëz në Shtetet e Bashkuara: rritja dhe ndryshimi deri në vitin 2065”, raporti vjen 50 vjet pas Aktit të Emigracionit dhe Shtetësisë së vitit 1965. Akti në fjalë zëvendësoi një sistem kuotash që favorizonte emigrantët europianë me një politikë që krijonte mundësi për ribashkime familjare dhe plotësimin e nevojave të punësimit në Shtetet e Bashkuara.

Që nga miratimi i këtij akti, 51 për qind e emigrantëve kanë ardhur nga Amerika Latine dhe një e katërta e emigrantëve të rinj vinin nga Azia.

Ajo që këto numra duan të thonë ia vlen t’i analizosh.

Shtetet e Bashkuara po drejtohen për një rekord të ri. Me një në pesë emigrantë në botë që zgjedhin Amerikën, Shtetet e Bashkuara kanë popullsinë më të madhe të emigrantëve në botë dhe kjo nuk duket se ka për të ndryshuar.

Në vitin 1890, gati 51 për qind e popullsisë amerikane ishte e lindur jashtë territorit. Në vitin 1965 ky numër ra në 5 për qind. Sot, rreth 14 për qind e popullsisë së vendit ka lindur në shtete të tjera. Në vitin 2065, sipas Pew, shifra do të arrijë një rekord të ri, në 18 për qind.

Deri në vitin 2065, Pew projekton që do të jetojnë 441 milionë njerëz në Shtetet e Bashkuara e 88 për qind e rritjes do të kontribuohet nga emigrantët e ardhshëm dhe brezat që ata do të gjenerojnë. /tesheshi.com/