Lufta e Bosnjës e viteve 90’ nisi me një diskurs të ashpër islamofob në nivelin politik, dhe pati rol në masakrat ndaj mijëra muslimanëve boshnjakë.
Një gjuhë jo e largët nga ajo e asaj periudhe po përdoret edhe tani nga politikanët serbë dhe kroatë me qëllime të rrezikshme, zbulon një raport i ri për Islamofobinë.
Para dhe gjatë konfliktit të vitit 1992 -1995, gjuha përçarëse dhe dehumanizuese u përdor me shpresën për ndarjen e vendit në “Kroacinë e Madhe” dhe “Serbinë e Madhe”.
Sipas Raportit Evropian të Islamofobisë 2018, i cili u botua nga Fondacioni për Studime Politike, Ekonomike dhe Sociale me bazë në Ankara, politikanët dhe disa pjesë të mediave po përpiqen të paraqesin në mënyrë të rreme Bosnjën si një “strehë radikale të muslimanëve” në mënyrë që të minojë vendin – përsëri me qëllim të ndarjes territoriale.
“Në vitin 2018, Milorad Dodik, udhëheqësi serb i Bosnjës dhe anëtar i sapozgjedhur serb i Presidencës së Bosnjes, ofendoi muslimanët boshnjakë duke iu referuar ezanit (thirrje për lutje) si ‘ulërimë” në një shfaqje në televizionin publik serb”, ka shkruar në raport Hikmet Karçiç, bashkautor dhe studiues në Institutin për Traditën Islame të Boshnjakëve.
“Për më tepër, viti 2018 pati një rritje të madhe në fanatizmin anti-Boshnjak dhe anti-musliman nga institucionet politike kroate dhe aktorët politikë rajonalë. Këta aktorë vazhdojnë ta paraqesin Bosnjën dhe Hercegovinën si një shtet të dështuar i cili po mbron ekstremistët dhe i cili duhet të ndahet në mënyrë territoriale për të siguruar paqen dhe sigurinë.”
39 studiues dhe ekspertë kontribuan në raportin e financuar nga BE.
Abdussamed Podojak, 24 vjeç, nga Sarajeva i tha Al Jazeera-s se retorika ishte duke u përdorur për të shënuar pikë politike.
“Pasojat tashmë dihen, ato kanë potencial vdekjeprurëse dhe mund të përkeqësohen.
“Për shkak të gjithë këtyre deklaratave dhe mendimeve (islamofobike) nga politikanët, unë njoh shumë njerëz që nuk ndjehen të sigurt për të shkuar në një pjesë tjera të vendit tonë, gjë që është absurde … retorika që promovon islamofobinë është më shumë se një katastrofë.”
Që nga përfundimi i luftës, nga 1996 deri në 2017, rreth 13 të kthyer boshnjakë u vranë dhe 20 u plagosën në krimet e urrejtjes në Republika Srpska, sipas raportit. Asnjë nga këto vrasje nuk është ndjekur asnjëherë penalisht.
Raportet e gjuhës së urrejtjes vijnë përballë sfondit të ndryshimit të dinamikës në Bosnjë, ku ndodhen më shumë se 25,000 migrantë dhe refugjatë nga Siria, Pakistani, Algjeria, të cilët territorin e Bosnjës e përdorin si “tranzit drejt BE-së”.
Në këtë drejtim, paralajmërimet për një kërcënim demografik musliman janë bërë edhe më të theksuara.
Sipas regjistrimit të fundit të Bosnjës në 2013-tën, muslimanët përbëjnë 50.11 përqind të popullsisë, të krishterët ortodoksë përbëjnë 31 përqind dhe katolikët përbëjnë 15 përqind. /tesheshi.com/
