Nga Alba Skëndaj
Të marrësh urbanin në qytetin e Durrësit për të shkuar në shkollë apo në punë, duhet t’i bësh llogaritë mirë. Me vonesa që shkojnë deri në 40 minuta, gjithmonë të tejmbushur, me kushte higjienike shumë larg standardeve, në shumë raste është “luks” edhe nëse urbani qëndron në stacion. Qendra “Konsumatori shqiptar” e cila ka monitoruar çdo ditë për tre muaj me radhë (dhjetor 2016-shkurt 2017) të gjithë urbanët që ofrojnë shërbimin e transportit publik, ka identifikuar një listë të gjatë me probleme, të cilat ia ka bërë prezente edhe autoritetit kontraktues që është bashkia e Durrësit. Vetë bashkia e Durrësit ka deklaruar se nuk e ka monitoruar asnjëherë këtë shërbim.
Problemet
Higjiena është problematike në të tre linjat e këtij qyteti. Raporti i monitorimit konstaton se “që në orët e para të mëngjesit mjetet e shërbimit publik janë të ndotura, duke nisur nga sediljet e deri tek dyshemeja, të mbushur me mbeturina, ndërkohë që kondicionerët nuk ndizen asnjëherë”. Vonesat në stacion janë një tjetër shqetësim për ata që përdorin transportin publik në Durrës. Më problematike është linja “Durrës- Currila- Durrës”, ku mund të qëndrosh në stacion nga 4-40 minuta duke pritur. Sipas raportit, shkak për këtë vonesë nuk është trafiku, por autobusët, qe ndonëse janë në stacion, nisen me vonesë. Ndërkohë që linja që shkon në universitetin e Durrësit, është aq e mbingarkuar saqë në shumë raste urbanët nuk ndalojnë fare në stacion, ndërsa në ditë pushimi dhe festa zyrtare kjo linje nuk funksionon fare.
“Të gjithë ata që përdorin transportin publik në Durrës, ankohen se është e pamundur të mbërrish në kohë në destinacion. Kjo, jo për shkak të trafikut në rrugë, por si rrjedhojë e numrit të pamjaftueshëm të autobusëve si dhe mosrespektimit të orareve të përcaktuara”, – na sqaron Ersida Teliti, drejtore ekzekutive e qendrës “Konsumatori shqiptar”.
Shumë pak urbane
Kur jemi në prag të sezonit turistik, me rreth 280 mijë banorë, me një kampus universitar dhe afërsisht 1 milionë turistë, linjat e urbanëve në qytetin e dytë më të madh në vend, nuk plotësojnë as kushtet më minimale.
Kështu, nëse sipas kontratave që kanë me bashkinë, tre operatorët privat duhet të kenë në total një numër prej 17 urbanësh që mbulojnë nevojat e qytetarëve për të udhëtuar me këtë formë transporti, në të vërtetë ata nxjerrin nga parqet e tyre të automjeteve vetëm 11 urbanë, ndërsa në raste piku 12 urbanë. Po ashtu për shkak të punimeve te Veliera, linja që kalon në këtë zonë, është detyruar të vërë në qarkullim urbanë me kapacitet më të vogël, por nuk e ka shoqëruar me shtim të numrit të tyre.
Kontratat me Bashkinë
Bashkia e Durrësit ka kontrata standard me tre operatorët që ofrojnë shërbimin e transportit publik në linjat “Durrës – Plepa”, “Durrës – Currila” si dhe “Durrës – Universiteti “A.Moisiu” qe ndryshojnë vetëm nga emrat e linjave, numri i urbanëve që ka secila dhe frekuenca e orareve. Sipas kontratave, bashkia e Durrësit i ka autorizuar operatorët që operojnë ne qytetin bregdetar, që përveç 20-25 personave qe do te ulen ne sedilje, ata mund të presin bilete edhe per 75-100 persona të tjerë në këmbë. Në këtë situatë është kuptueshme që të pretendosh për vende të rezervuara për nënat e reja, gratë shtatzëna apo persona të tjerë me nevoja të veçanta, duket luks.
Sipas Telitit, Bashkia u kontaktua dy herë nga qendra “Konsumatori shqiptar”, komunikime të cilave bashkia u ka është përgjigjur se nuk ka asnjë relacion për përmbushjen e detyrimeve kontraktore nga këta operatorë, pasi nuk janë monitoruar asnjëherë. “Në fakt vetëm bashkia e Tiranës ka monitoruar më parë cilësinë e shërbimeve të transportit publik ne qytet. Kjo është bashkia e dytë ku ndodh një proces i tillë. Me anë të këtij raporti ne nuk duam të fajësojmë askënd, por të kuptojmë se ku dhe cilat janë problematikat dhe së bashku: me bashkinë, por edhe operatorët privatë që ofrojnë këtë shërbim, të gjejmë rrugët se si ta përmirësojmë. Në fundit të fundit të gjithë biem dakord që qytetarët meritojnë të udhëtojnë në kushte më dinjitoze”, – përfundon Teliti. /tesheshi.com/
