Në raportin e Bankës Botërore thuhet se këtë vit Kosova, Shqipëria dhe Mali i Zi kanë shënuar rritje të rëndësishme, falë projekteve të mëdha të financuara nga investime të huaja të drejtpërdrejta, por edhe eksporti më i madh kur bëhet fjalë për Kosovën .
Sa u përket treguesve ekonomikë në rajon, Banka Botërore prognozon se lider do të jetë Kosova me rritje prej 4.4 %, më pas Mali i Zi me 4.2%, Shqipëria me 3.8%, Bosnja dhe Hercegovina me 3% dhe Serbia me 2%.
Banka botërore vlerëson se rritja ekonomike e Maqedonisë këtë vit do të jetë më e ulta në rajon apo 1.5% gjë që sipas tyre është si pasojë e krizës politike në vend. Për të pasur rritje Banka Botërore rekomandon një politikë më efikase tatimore, racionalizim të subvencioneve sidomos në bujqësi dhe qendrueshmëri të sistemit pensional.
Pas Maqedonisë, në raport rradhitet Serbia si shtet që ka shënuar rënie rritja ekonomike, si rrjedhojë e temperaturave të ultë gjatë janarit dhe shkurtit, që shkaktoi ulje të prodhimtarisë bujqësore dhe aktivitetit në sektorin e ndërtimtarisë.
Prognoza e rritjes ekonomike në Maqedoni për këtë vit, sipas Bankës Botërore nuk është optimiste. Me rritjen vetëm 1.5%, ekonomia vendore renditet në fund në krahasim me vendet e Ballkanit Perëndimor. Deficiti buxhetor prognozohet në 3% të Bruto Prodhimit Vendor. Si arsye kryesore për treguesit ekonomikë jo të favorshëm përmendet kriza politike por edhe pasiguria tek qytetarët dhe sektori privat.
Në raportin për gjysmën e vitit theksohet se vitin e ardhëm priten rezultate më të mira, me rritje prej 3.2%, ndërsa në vitin 2019, rritja parashikohet të jetë 3.9%.
“Konsumi final, ashtu si edhe në të kaluarën, mbetet motori kryesor i rritjes ekonomike, i mbështetur edhe në rritjen e punësimeve, rritjen e pagave, pensioneve dhe në mbështetjen kreditore nga bankat. Krijimi i vendeve të punës, me përkrahjen e politikave aktive të tregut të punës, janë nxitje e rëndësishme financiare, ashtu siç ndodhi në sektorin tregtar, në industrinë përpunuese dhe atë të transportit”, u shpreh Bojan Shimbov, ekonomist në Bankën Botërore.
Maqedonia e ka normën e dytë më të lartë të papunësisë në rajon, pas Kosovës. Sivjet pritet të zvogëlohet për 1,7 për qind, kryesisht si rezultat i masave aktive për punësim, gjegjësisht lirim nga pagesa e kontributeve. Këto politika duhet të vazhdohen, por shumë më me kujdes, këshillojnë nga Banka Botërore.
“Në rrethimin e kufizuar fiskal, në të cilin Qeveria duhet doemos të marrë vendime të kujdesshme se ku dot a investojë çdo denarë, duhet të orientohen paratë drejt atyre që më së shumti u nevojiten, me qëllim që kjo të ndikojë në uljen e varfërisë në mënyrë më efikase”- tha Barbara Kunja, ekonomiste e lartë në Bankën Botërore. /tesheshi.com/
