Zyra e Kryeprokurorit të Shtetit ka informuar se raporti i ekspertizës nga Austria ka konstatuar se nuk ka pasur manipulim apo ndërprerje të video-incizimeve të kamerave të sigurisë, lidhur me rastin e vdekjes së të ndjerit Astrit Dehari.
Videot që iu nënshtruan ekspertizës u siguruan nga Qendra e Paraburgimit në Prizren, për intervalin kohor të datës 05.11.2016, nga ora 00:00:00 minuta deri 23:59:59 minuta.
“Raporti ka konstatuar se të gjitha video-incizimet paraqesin vulat kohore dhe janë gjithashtu të shikueshme. Gjatë ekspertizës së videove raporti ka konstatuar se këto janë në gjatësi identike dhe me këtë mund të përjashtohet manipulimi. Raporti i ekspertizës po ashtu ka konstatuar se nuk ka pasur manipulim apo ndërprerje të tyre”, thuhet në njoftim.
Prokurori i Shtetit më tej thotë se pas pranimit të raportit të ekspertizës do të vlerësojë dhe analizojë të gjitha provat dhe faktet e mbledhura në këtë çështje penale dhe së shpejti do të dalë me vendimin përfundimtar lidhur me këtë çështje.
Video-incizimet (3 DVR) janë dërguar në muajin shkurt në institutin “IT Forensics BKA”, të Austrisë, Enti Federal i Kriminalistikës, për të vlerësuar autenticitetin e tyre, nëse ka pasur ose jo ndërhyrje në to. /tesheshi.com/
