Një raport i Departamentit të Shtetit të SHBA-së për Shqipërinë është nxjerrë pikërisht para takimit të Edi Ramës në Shtëpinë e Bardhë; dhe ka mbajtur një qëndrim të ashpër, të prerë e aspak miqësor ndaj qeverisë së Tiranës, por dhe organeve të Drejtësisë, që tregon edhe drejtimin që do të kenë bisedimet Rama-Obama.
Raporti i DASH thekson se në Shqipëri pandëshkueshmëria ka arritur maja të larta dhe ata zyrtarë që qeveria ka dërguar në ndjekje penale janë liruar nga Prokuroria.
Në mënyrë të hapur vetëm se nuk përmendet me emër, por rasti “Fullani” si dhe i një sërë zyrtarësh të tjerë që u janë mbyllur dosjet, sidozot Arben Imamit, shikohen si skandal nga qeveria e Shteteve të Bashkuara të Amerikës.
Të gjitha këto bëhen publike në raportin e Departamentit Amerikan për të Drejtat e Njeriut.
Korrupsioni, thekson dokumenti, është i përhapur edhe në radhët e policisë, në institucionet arsimore, përfshirë këtu edhe universitetet publike.
“Ndjekjet ligjore dhe sidomos dënimet e zyrtarëve që kanë kryer shkelje kanë mbetur sporadike dhe të paqëndrueshme. Zyrtarët, politikanët, gjykatësit dhe personat me lidhje të fuqishme biznesi, shpesh kanë mundur t’i shpëtojnë ndjekjes penale. Qeveria filloi hetimet për disa zyrtarë të nivelit të lartë, por prokuroria më pas vendosi t’i pushojë këto çështje”, thuhet në kapitullin për Shqipërinë të raportit global të DASH.
“Problem rrënjësor – cilëson raporti – mbeten gjithashtu edhe dhuna në familje, së bashku me diskriminimin ndaj grave. Abuzimi ndaj fëmijëve nuk ngelet mbrapa. Vendi vazhdon të jetë një burim dhe destinacion për burra, gra dhe fëmijë që i nënshtrohen trafikimit seksual dhe punës së detyruar.”
Sipas raportit, “policia ka keqtrajtuar disa nga të dyshuarit gjatë procesit të ndalimit apo marrjes në pyetje”. “Po ashtu, kushtet në burgje paraqiten si shumë të rënda”, theksohet aty.
Një pikë tjetër e prekur nga dokumenti i DASH është e drejta e pronës ku thekson se qeveria ka bërë pak përparim në trajtimin e kërkesave të shumta për kthimin apo kompensimin e pronave të konfiskuara gjatë kohës së komunizmit.
Edhe njëherë duhet theksuar fakti se raporti i Departamentit të Shtetit publikohet pikërisht në ditën kur Rama do shkojë në Shtëpinë e Bardhë për t’u takuar me Presidentin Obama.
Dhe kjo nuk ka se si të jetë thjesht një rastësi, pasi diplomacitë e zhvilluara, e sidomos ajo amerikane, nuk i lënë asgjë rastësisë dhe në çdo akt, sado rutinë e kortezial të duket, kanë një mesazh për të përcjellë.
Sakaq, me interes pritet dhe intervista që Rama pritet të japë në Zërin e Amerikës, atje shtetarët shqiptarë duket sikur futen në “dhomën e torturës”.
Dhe Rama e të tijtë kanë një përvojë jo të mirë me median që pasqyron “humorin” e Uashingtonit me Tiranën zyrtare. Ata gati janë vënë me shpatulla për murri gjatë shënjestrimit me pyetje, të cilat i kanë nervozuar së tepërmi deri në humbje qetësie.
Përgatiti: Ylli Pata – /tesheshi.com/
