Opozita dhe mazhoranca kanë dorëzuar dy raporte të ndryshme në Kuvend për kërkesën e prokurorisë për arrestimin e ish-ministrit të Rendit, Samir Tahiri. PD dhe LSI kërkojnë që të pranohet në tërësi kërkesa e prokurorisë, ndërsa PS-ja pranon pjesërisht këtë kërkesë në hetimin dhe kontrollin e banesës por jo arrestimin e deputetit të saj.
Më poshtë konkluzionet e dy raporteve zyrtare të dorëzuara në Kuvend, hartuar nga anëtarët e Këshillit për Imunitetin.
Argumentet e PD-LSI: Mbrojtja e Ramës u mbyll gojën dëshmitarëve
Përfundimisht, 5 deputetët e Këshillit për Imunitetin, i rekomandojnë seancës plenare të Kuvendit të Republikës së Shqiperisë të votojë, për miratimin e dhënies së autorizimit, të kërkuar me kërkesën nr. 9906 prot., datë 19.10.2017 të Prokurorisë pranë Gjykatës së Shkallës së Parë për Krime të Rënda “Për dhënien e autorizimit për arrestimin, kontrollin personal dhe kontrollin e banesës së deputetit Saimir Tahiri”, me qëllim për t’i hapur rrugë hetimit të plotë dhe të gjithanshëm në kuadër të procedimit penal nr. 313, të vitit 2017 për veprat penale të trafikimit të lëndëve narkotike në bashkëpunim në formën e posaçme të grupit të strukturuar kriminal dhe të korrupsionit pasiv të zydarëve të lartë të parashikuara nga nenet 283/a/2, 333/a dhe 260 të Kodit Penal.
Tahiri nuk është një ish ministër apo deputet i opozitës. Ai është ish ministër i qeverisë, deputet i Edi Rames, mik i ngushtë i kryeministrit. Ai si ish ministër, jo vetëm që dyshohet se ka ndihmuar organizatën kriminale dhe ka marrë shpërblime personale, por duke i vënë strukturën e shtetit në shërbim të organizatës kriminale ai ka siguruar PARA PER ZGJEDHJET. Arsyeja pse duhet arresti nuk është vetëm analiza e nenit 288 te KPP, siç për një qytetar të zakonshëm, por se bëhet fjalë për mikun e kryeministrit dhe ministrit të brendeshëm aktual.
Këta dy të fundit kanë nën mbikqyrje provat dhe duke mbajtur Tahirin jashtë dhe duke e mbajtur nën mbrojtje, provat mund të dëmtohen, radarët, dëshmitarët që shohin Ramën në krah të Tahirit heshtin, bashkëpuntorët e drejtësisë, brenda dhe jashtë Shqipërisë. Pra ka një rrezik real që bëhet me qëllim për t’i shërbyer Tahirit dhe bandës kriminale që është në hetim në Shqipëri dhe Itali. Kuvendi i Shqipërisë nuk mund të bëhet kurrë streh e krimit apo mbështetësve direkt të tij.
Argumentet e PS-së: Po hetimit, jo arrestimit
Në të tilla kushte, mbështetur në parimet tona kushtetuese për funksionimin e shtetit të së drejtës, barazisë së të gjithë shtetasve përpara ligjit, opinioneve të Komisionit të Venecias, rrethanave të parashtruara nga prokuroria dhe vleresimit të ekzistencës së motivimit politik në paraqitjen e kësaj kerkese nga ana e prokurorisë, mos respektimit nga ana e Prokurorisë të kërkesave te nenit 288 të Kodit të Procedures Penale, ne deputetet e mazhorancës të Këshillit për Rregulloren, Mandatet dhe Imunitetin, i rekomandojmë Kuvendit të votojë:
Pranimin e kerkeses së Prokurorise prane Gjykates së Shkallës se Pare për Krime të Rënda Tiranë per: –Dhenien e autorizimit për kontrollin personal dhe të baneses për deputetin e Kuvendit të Republikes së Shqiperise Saimir Tahiri.
-Dhënien e autorizimit për ndalimin e daljes jashte shtetit, detyrimin për t’u paraqitur në policinë gjyqësore, ndalimin dhe detyrimin per qëndrimin në një vend të caktuar, si masa shtrenguese të heqjes së lirisë në kuptim të germave a), b), c) të nenit 232 të Kodit të Procedurës Penale të Republikes se Shqipërisë.
Rrezimin e kërkesës së Prokurorisë prane Gjykatës së Shkallës së Parë për Krime të Rënda Tirane për dhënien e autorizimit për masën e arrestit në burg ose në shtëpi për deputetin e Kuvendit të Republikës së Shqipërisë Saimir Tahiri, në kuptim të shkronjave d) dhe dh) të nenit 232 të Kodit të Procedures Penale të Republikës së Shqipërisë. /tesheshi.com/
