Josip Juratovic, anëtari i Bundestagut gjerman me origjinë kroate, ka shfaqur dualitetin BE-SHBA sa i përket fatit të Kosovës dhe zgjidhjes përfundimtare të çështjes së saj në raport me Serbinë. Në një prononcim për BIRN, Juratoviç tha se pozicioni i Bashkimit Europian mbi marrëdhëniet e Serbisë me ish-provincën e saj, Kosovën do të vendoset “ekskluzivisht” në përputhje me rregullat e vetë bllokut dhe jo sipas opinionit të Shteteve të Bashkuara
“Një gjë duhet të jetë e qartë; marrëdhëniet Serbi-Kosovë janë një çështje e BE-së, përsa kohë që të dy vendet janë të interesuara për t’u bërë anëtare. Në opinionin tim, pozicioni i BE-së nuk do të bazohet te opinionet e analistëve apo te Shtetet e Bashkuara, por ekskluzivisht në standardet dhe ligjet e veta, të cilat janë të barabarta për çdo vend anëtar të BE-së”, tha ligjvënësi gjerman, një deklaratë që mund të shkaktojë probleme këtej e tutje dhe që reflekton krizën transatlantike. E sa i përket çështjes së ndryshimit të kufijve, Juratoviç ka cituar Merkelin kur tha se “integriteti territorial i shteteve të Ballkanit Perëndimor është i vendosur dhe i paprekshëm.”
Sipas tij, ky nuk është vetëm qëndrimi i Merkelit por dhe i gjithë BE-së.
Juratovic, i cili drejton grupin e Bundestagut për Europën Juglindore thotë se çdo shkëmbim territory, përmes së cilës Kosova do të hiqte dorë nga veriu i vet kryesisht serb dhe do të aneksonte Luginën e Preshevës, kryesisht shqiptare, do të thotë të shkosh drejt një situate “të panjohur” dhe “shumë të komplikuar”, e cila do të kërkonte referendum.
“Unë nuk e di se si mund të zhvillohet kjo procedurë, pasi nuk është vetëm çështje e shkëmbimit të territorit dhe e vullnetit të qeverive, por një çështje e qytetarëve të cilët nuk e pranojnë këtë fakt,” tha ai, duke shtuar se: “dhe sigurisht, faktori rëndues është se BE nuk e pranon ndryshimin e kufinjve”. /tesheshi.com/
