Produktet e kompanisë amerikane Extreme Networks, pavarësisht sanksioneve të vendosura që nga viti 2014, përfunduan te prodhuesi rus i sistemeve raketore MMZ Avangard, shkruan Reuters.
Që kur Rusia aneksoi Krimenë në vitin 2014, sipas Reuters, kompanive amerikane u është ndaluar të bëjnë biznes me MMZ Avangard, një kompani shtetërore që prodhon raketa për një nga armët më të sofistikuara të Rusisë, sistemin e mbrojtjes ajrore S-400.
Si masë e shqetësimeve perëndimore për S-400, Shtetet e Bashkuara e përjashtuan Turqinë anëtare të NATO-s nga programi i përbashkët i avionëve luftarakë në 2019, pasi Ankaraja morri sistemin rus.
Më saktë, Extreme Networks po i siguronte MMZ Avangard pajisje rrjeti kompjuterik për sistemet e TI-së së zyrës, sipas e-maileve dhe të dhënave të tjera të biznesit të marra nga Reuters.
Në një deklaratë për Reuters, Extreme tha se bazuar në informacionin e dhënë nga agjencia e lajmeve, ata besojnë se pajisjet “mund” t’i jenë shitur MMZ Avangard duke përdorur një blerës përfaqësues. Ata shtuan se pajisjet janë shitur pa dijeninë e tyre.
Ata shtuan, pa dhënë prova, se ndërmjetësi në Rusi ishte një “bashkëpunëtor” në furnizimin e produkteve të tij përmes një kompanie false për “aktorë të këqij”.
Ata theksuan se zbulimet e tyre, si dhe shitjet e mundshme, i raportojnë tek autoritetet amerikane.
Ukraina ka akuzuar Rusinë për përdorimin e raketave të prodhuara nga MMZ Avangard kundër objektivave tokësorë që kur Moska nisi atë që ajo e quan “operacionin e saj special” më 24 shkurt.
Autoritetet ukrainase pretendojnë se raketat MMZ Avangard vranë të paktën 30 civilë në një sulm ndaj një autokolone në periferi të qytetit jugor të Ukrainës, Zaporozhye, muajin e kaluar.
Midis 2017 dhe 2021, MMZ Avangard bleu pajisje nga Extreme me vlerë më shumë se gjysmë milioni dollarë për sistemet e saj IT, sipas Reuters.
Produktet përfshinin çelësa me shpejtësi të lartë, një komponent thelbësor i rrjeteve të IT të korporatave dhe softuer.
Të dhënat tregojnë gjithashtu se marrëveshjet kaluan përmes një korporate në dukje të padëmshme pranë Moskës, dhe pavarësisht se dy zyrtarë të Extreme ngritën shqetësime, shitja vazhdoi.
Në prill, gjashtë javë pas pushtimit rus të Ukrainës, një punonjës i Extrem paraqiti një ankesë të brendshme, të parë nga Reuters, duke pretenduar se kompania u shet prodhuesve të ndryshëm ushtarakë në Rusi.
“Pajisjet e Extreme përdoren në anijet luftarake ruse në sistemet e komunikimit”, thuhet në ankesë.
Extreme deklaroi se akuzat janë bërë nga një punonjës i pakënaqur.
Një hetim nga kompania nuk gjeti asgjë për të vërtetuar ndonjë nga pretendimet derisa Reuters solli “fakte të reja” në vëmendjen e kompanisë këtë muaj. /tesheshi.com/
