Anëtarët e ekipit të Donald Trump parandaluan, derisa ai ishte në Shtëpinë e Bardhë, zyrtarët shëndetësorë që të jepnin informacione të caktuara për COVID-19 në mënyrë që raportet t’i bënin më në përputhje me vizionin optimist të ish-presidentit amerikan, sipas një raporti parlamentar, shkruan AFP.
Zyrtarë të lartë në Qendrat për Kontrollin dhe Parandalimin e Sëmundjeve (CDC), agjencia kryesore federale shëndetësore e Shteteve të Bashkuara të Amerikës, u thanë hetuesve se anëtarët e administratës Trump frikësuan stafin e tyre dhe u përpoqën të rishkruanin raportet e tyre për t’u lidhur me deklaratat e presidentit të cilat minimizonin krizën epidemike.
Hetuesit intervistuan një duzinë ish-zyrtarë dhe zyrtarë aktualë të CDC-së, si dhe zyrtarë të lartë të qeverisë, për këtë raport prej 91 faqesh të publikuar nga një komitet i kongresit që merret me krizën COVID-19.
Në të, komiteti përshkruan se si zyrtarët e Departamentit të Shëndetësisë, të emëruar nga Donald Trump, u përpoqën të merrnin kontrollin e revistës shkencore të CDC, Raportin Javor të Morbiditetit dhe Vdekshmërisë, duke redaktuar ose censuruar artikuj që ata i konsideronin të dëmshëm për presidentin republikan.
Shëndeti publik i minuar në favor të qëllimeve politike
Ata zyrtarë u përpoqën të “ndryshonin përmbajtjen, kundërshtonin ose vononin publikimin” e 18 prej atyre raporteve javore, si dhe paralajmërimeve shëndetësore, dhe ia dolën në pesë raste, thuhet në raportin e komitetit të Kongresit.
Hetimi i komitetit “tregoi se administrata e mëparshme filloi një fushatë të ndërhyrjes së paprecedentë politike në përgjigjen e qeverisë federale ndaj pandemisë, e cila minoi shëndetin publik në favor të qëllimeve politike të ish-presidentit,” tha kryetari i komisionit të sapozgjedhur demokrat Jim Clyburn në një deklaratë për publikun.
Raportet e mëparshme kanë nxjerrë në pah tashmë përpjekjet e administratës Trump për të censuruar zyrtarët e lartë shëndetësorë ose për të ushtruar presion ndaj Administratës së Ushqimit dhe Barnave të SHBA-së për të rilëshuar miratimin urgjent për hidroksilklorinën. Ky ilaç kundër malaries është shpallur nga Donald Trump si një kurë për COVID-19, pavarësisht nga provat për të kundërtën.
Por republikanët hodhën poshtë të hënën gjetjet e raportit, duke i quajtur ato të njëanshme dhe duke u zotuar të kryejnë hetimin e tyre nëse fitojnë përsëri shumicën në secilën nga dhomat e Kongresit në zgjedhjet e nëntorit. /tesheshi.com/
