Antonio Conte, trajneri aktual i kombëtares italiane, do ta lërë postin e tij menjëherë pas Euro 2016-ës, për të marrë drejtimin e Çelsit në Angli.
Një sërë emrash janë përmendur si zëvendësues të tij, e në mes tyre është dhe Claudio Ranieri, që drejton Lestërin, skuadrën kryesuese të kampionatit anglez.
Por vetë ai e ka përjashtuar një mundësi të tillë, duke shprehur dëshirën që ta mbyllë karrierën si trajner te Lestëri.
I pyetur nga periodiku sportiv gjerman Kicker, Ranieri është përgjigjur shkoqur: “Jam shumë i lumtur këtu, dhe nuk mendoj një ndryshim. Jam i mendimit se Lestëri do të jetë pikëmbërritja ime e fundit si trajner.”
“Shpresoj se ata do të më ofrojnë një kontratë të gjatë, gjashtë apo shtatë vite. Dhe atëherë do t’i jap fund karrierës time këtu.”
Lestëri kryeson kampionatin anglez, duke qenë pranë momentit historik të fitimit të tij. Ndërsa kanë mbetur dhe pesë ndeshje për t’u luajtur, Lestëri është shtatë pikë para Totenhemit.
Kurse, si për ta përforcuar vendimin, në një intervistë për stacionin radiofonik Radio Deejay, Ranieri e ka mohuar prerë marrjen e kombëtares italiane, “Kombëtaren italiane? Eshtë kapitull i mbyllur për mua. U dogja tashmë në Greqi.” /tesheshi.com/
