Ramush Haradinaj nuk i ka ecur edhe aq mbarë vizita e tij e parë si kryeministër në Bruksel. Ai edhe pse u prit të premten nga përfaqësuesja e BE-së, Frederica Mogherini, dhe iu organizua një pritje nga bashkatdhetarët atje, nuk pa pasur rastin të paraqitet në konferencë mediale pas takimeve të Këshillit të Stabilizim Asociimit, siç kishte rastin me homologen nga Serbia.
Kjo pasi pa asnjë paralajmërim në momentin e fundit, është anuluar konferenca për shtyp në selinë e Bashkimit Evropian në Bruksel, në të cilën Mogherini dhe Haradinaj, iu është dashur të njohin opinionin për rrjedhën e takimit të Këshillit të MSA-së mes BE-së dhe Kosovës.
Edhe pse gjithçka ishte gati për këtë konferencë shtypi, përkthyesit në disa gjuhë ishin në kabinat e tyre, ndërsa shërbimi satelitor ishte gati të transmetojë në kohë reale konferencën, e cila duhej të transmetohej edhe nga televizionet në Kosovë, kjo u anulua me arsyetimin e dhënë nga zëdhënësja Maja Kocinaçiç “për shkak të agjendës”.
Por ky arsyetim i BE-së është tejet i çuditshëm kur kjo konferencë shtypi ka qenë pjesë e agjendës e paralajmëruar para shumë kohësh.
Por shtrohet pyetja pse kjo gjë ndodhi vetëm në rastin e Kosovës?
Pa kurrfarë problemi të enjten u zhvillua konferenca e shtypit mes BE-së dhe Serbisë, kurse të mërkurën mes BE-së dhe Shqipërisë pas takimeve të Këshillit të Stabilizim Asociimit me këto dy shtete.
Me fusnotë…
Por ky nuk është problemi i vetëm që i ndodhi Haradinajt dhe delegacionit kosovar në Bruksel.
Në takimin e dytë të Këshillit të Stabilizim-Asociimit, pala kosovare nuk i është ekspozuar flamuri por është prezantuar me fusnotë, çka u konfirmua sërish se nuk është shkrirë, siç deklaronte ish-kryenegociatorja Edita Tahiri.
Kujtojmë se takimet e këtij Këshilli në këtë nivel zhvillohen vetëm njëherë në vit dhe ato janë rast i rrallë që të bëhen pyetje rreth Kosovës edhe zyrtarëve më të lartë të BE-së.
Ata shumë rrallë dalin para gazetarëve me politikanë të Kosovës, ndërsa nuk hezitojnë kur është fjala për politikanë nga vendet e tjera të rajonit. /tesheshi.com/
