![Një ushtar izraelit qëndron me kompleksin e Xhamisë Al-Aksa në sfond [Dosje: Maya Alleruzzo/AP Photo]](https://tesheshi.com/wp-content/uploads/2024/12/Kolonet-izraelite-shkelin-status-quo-ne-ne-kompleksin-e-xhamise-Al-Aksa-360x180.webp)
Mijëra qytetarë protestuan sot në sheshin “Skënderbeu”, në Prishtinë në përkrahje të Ramush Haradinajt.
Me parrulla në duar “Një komb, një qëndrim për Ramushin”, “Haradinaj është çlirimtar”, “Kriminelët kërkoni në Serbi”, “Mos e fyeni Kosovë”, etj, protestuesit kanë kërkuar lirimin nga organet franceze sa më shpejt ta lirojnë plotësisht kreun e AAK-së.
Kryetari i OVL UÇK-së, Hysni Gucati tha se janë tubuar sot që t’i tregohet regjimit fashist të Beogradit të heq dorë nga e kaluara e t’i kthehet realitetit.
Ai shtoi se ata nuk mund të frikësojnë me akuza të fabrikuara si kjo ndaj Haradinaj.
“Lufta jonë ka qenë e drejtë dhe e pastër. Haradinaj ka dëshmuar pafajësinë në Hagë dhe i bëjmë thirrje Francës mike që të mos eksdradoj Haradinajn në Serbi”, ka thënë Gucati.
Ndërsa Fatmir Limaj, kryetar i NISMA-s, tha se kush e prek Haradinajn i prek edhe themelet e shtetit të Kosovës
“Ramushi do të kthehet s’ka asnjë dilemë. Po vjen koha për Ramush Haradinajn”, tha Limaj, derisa kërkoi nga qeveria që të ndërprej dialogun me Serbinë.
Një fjalim e ka mbajtur edhe analisti kosovar, Dardan Islami, i cili tha se është koha që komandanti të kthehet në atdhe.
“Ne ish-ushtarët e tu e presim kthimin tënd në atdhe. Ti je i pafajshëm, këtë e dinë edhe ata që fabrikojnë sepse ti ua prishe planet për ndarjen e Kosovës qysh në vitin 1999. Pafajësinë tënde e ka vulosur gjykata e Hagës. Apelojmë nga shteti mik i Francës që sa më shpejt të lirojnë Haradinajn për tu kthyer në atdhe” ka thënë Islami.
Në protestë përveç disa deputetëve të AAK-së e NISMA-s prezent ishin edhe deputeti i VV-së Rexhep Selimi dhe Shpend Ahmeti, që është kryetar i Prishtinës.
Ndryshe, Haradinaj më 4 janar është arrestuar në Francë nga Interpoli me flet-arrest të Serbisë.
Më 12 janar lideri i Aleancës u lirua nga autoritetet franceze por me kusht që të mos dalë nga Franca dhe dy herë në javë të lajmërohet tek autoritetet.
Kjo situatë do të vazhdojë derisa të shqyrtohet kërkesa e Serbisë për ekstradim të tij. /tesheshi.com/
