Ramush Haradinaj mbetet sërish në Francë, ndërsa një gjykatë e atij vendi ka vendosur që vendimin ndaj tij ta japë më 6 prill.
“Vendimi merret më 6 prill,” ka thënë Haradinaj pas përfundimit të seancës.
“Gjykata ka vendosur për informata shtesë. Vendimi i radhës më 6 prill. Jam peng politik,” janë fjalët e tij.
Ai akuzohet nga drejtësia e Serbisë për krime lufte. Nisur nga këto akuza, Prokuroria Speciale e Serbisë pati paraqitur dhe kërkesën për ekstradimin e Haradinajt në Serbi.
Por gjykata franceze, në seancën e mbajtur më 9 shkurt, nuk vendosi përfundimisht për këtë rast, duke e lënë Haradinajn nën masën e lirimit me kusht dhe duke e shtyrë vendimin për datën 2 mars.
Para kësaj seance gjyqësore, autoritetet serbe kishin deponuar materiale shtesë, dhe kjo ka ndikuar që gjykata në Colmar ta zvarrisë marrjen e vendimit përfundimtar.
Haradinaj pati deklaruar se fletarrestimi ndaj tij është i motivuar politikisht nga autoritetet serbe.
Ai i ka thënë radios Evropa e Lirë se ndalimi i tij nga autoritetet franceze nuk është dashur të ndodhë fare, ngase fletarrestimet serbe janë të pakuptimta. Urdhër-arrestet serbe, është shprehur Haradinaj, nuk po respektohen tashmë nga shumë shtete, si Gjermania, Britania e Madhe, e vende të tjera.
Ndalimin e tij në Francë, Haradinaj e ka cilësuar si mbajtje peng, që vjen si pasojë e veprimeve politike të lidershipit të Serbisë.
“Nikoliç, Vuçiç e Daçiç kanë qenë pjesë e strukturave të Millosheviqit që u kanë shkaktuar tragjedi popujve të Ballkanit, prej Bosnjës, Kroacisë dhe Kosovës. Asnjëri nga ata nuk ka kaluar nëpër ndonjë gjykatë, qoftë vendore apo ndërkombëtare. Ndërkaq, unë kam kaluar para (nën një proces gjyqësor) një gjykate ndërkombëtare, e cila e ka filtruar, pra e ka dhënë pafajësinë time, për luftën gjatë vitet 1998 – 1999. Jam shqiptar. Kam lindur shqiptar. I detyrohem popullit dhe vendit tim, dhe për këtë jam krenar. I mbetem besnik popullit dhe vendit tim, dhe nuk njoh juridiksion serb mbi mua,” deklaronte Haradinaj. /tesheshi.com/
