Partia e Ramush Haradinajt, AAK është e befasuar me vendimin e sotëm të autoriteteve gjyqësore franceze, që lideri i tyre të mos kthehet në Kosovë.
Përmes një komunikate dërguar mediave kjo parti konsideron se vendimi që ai të lirohet por të mos mund të kthehet në atdhe është plotësisht i padrejt.
“Ne apelojmë tek organet e drejësisë në Francë që të përshpejtojnë procedurat dhe t’i japin fund çfarëdo mase kundër Ramush Haradinajt, meqë ai i ka spastruar të gjitha pretendimet për krime lufte në procesin gjyqësor në Tribunalin Ndërkombëtar për Krime Lufte në Ish-Jugosllavi”, thuhet në reagim.
AAK thotë se e kupton mospajtimin e miliona mbështetësve të Haradinajt në këtë proces, dhe u bën thirrje të gjithë atyre, që mbështetja të vazhdojë të jetë civilizuese dhe e dinjitetshme.
“Ne jemi të bindur se mbajtja e Haradinajt në Francë dhe procesi kundër tij, i inicuar me fletarrest politik të Serbisë, do të marrë epilog pozitiv shumë shpejt”, thotë AAK
Ndërsa, Rachel Lindon, avokatja e Ramushit, menjëherë pas vendimit të Gjykatës në Colmar, ka thënë për mediat franceze se kërkesa për ekstradimin e tij në Serbi duhet të refuzohet nga drejtësia franceze. /tesheshi.com/
