Lideri i AAK-së, Ramush Haradinaj, thotë se kërkesë e opozitës është që mazhoranca të reflektojë për Asociacionin e Komunave me shumicë serbe dhe Demarkacionin me Malin e Zi, të anulohen versionet e tanishme të këtyre marrëveshjeve për një version potencail në të ardhmen.
“Ne ju themi partnerëve ndërkombëtarë që të anulohen. Kërkesa jonë nuk është dorëheqja e qeverisë por anulimi i dy marrëveshjeve. Seancat solemne do të kalojnë ashtu si jemi marrë vesh. Nesër do të jetë seancë e zakonshme. Pasnesër ose javën e ardhshme nuk e di”, tha Haradinaj, në emisionin Click të RTV21.
Hardinaj, ka thënë se gjuhë të rëndë ka përdorur edhe në vitin 2004, jo vetëm tani, derisa ka paralajmëruar rivalët e tij politik se nuk ua ka frikën.
“Vetëm Zotit atij i kofsha falë, vetëm atij i tutna. Nuk më frikëson asgjë. Me qenë vendi im në rrezik, unë jam në gjendje me bërë gjithçka. Me marrë dikush diçka prej vendit tim prishet rëndë me mua. Këto dy tema janë ndryshe. Sidomos Asociacioni”, ka deklaruar Haradinaj.
Ai ka ka treguar edhe pse vendosi që të bëjë padi kundër kryetarit të Pejës, Gazmend Muhaxherit, me ç’rast tha se ky i fundit tani e ka rastin që të gjitha ato që i thotë në media, t’i thotë në gjyq.
“Ka bazë për një padi të cilën e kemi bërë. Pa hyrë në diskutim për gjithë atë që ka thënë kryetari Muhaxheri, kemi kërkuar nga gjyqi, ose kemi bërë një padi në gjyq që të vërtetohen nëse ato që ka thënë a janë të vërteta, nëse jo të kërkohet një sanksion ligjor ndaj kryetarit Muhaxheri. Këtë kam mundur ta bëj edhe më herët sepse ka pasur materiale për ta bërë edhe më herët por nuk kam vepruar kështu, mirëpo kësaj herë kam vendosur t’i drejtohem gjyqit. Të them të drejtën kam paralajmëruar me kohë që nuk do t’i toleroj këto. Ky është rasti i parë që bëj padi. Më herët kam kërkuar që gjykata t’i hetojë të gjeturat që ky thotë. Kësaj here, situata ka avancuar, është bërë padi direkte”, ka deklaruar Haradinaj.
Përgatiti: Blendi Gashi – /tesheshi.com/
