Dy partitë opozitare në Kosovë, AAK dhe NISMA kërkojnë që të shpallen zgjedhjet e reja.
Liderët e këtyre dy partive, Ramush Haradinaj (AAK) dhe Fatmir Limaj (NISMA) në një konferencë të përbashkët për media deklaruan se qeveria e Kosovës po tenton t’i trafikojë dy marrëveshjet që sipas tyre janë të dëmshme për vendin.
“Ne si Nismë dhe AAK kërkojmë që menjëherë të ulemi dhe të shpallim datën e zgjedhjeve dhe pastaj të flasim për këto dy tema. Kjo neglizhencë e ka dëmtuar Kosovën dhe po e dëmton procesin e liberalizimit. Rruga dhe tendenca për të kaluar përmes trafikimit dhe presionit ndaj deputetëve ka vetëm pasoja, andaj kërkojmë të ndalohet çfarëdo tentative për t’i kontrabaduar këto marrëveshje dhe vendi të shkojë në zgjedhje”, deklaroi Limaj.
Edhe kryetari i AAK-së Ramush Haradinaj tha se duhet që të ndërpritet kjo gjendje dhe të vendoset për zgjedhje.
“Jemi të shqetësuar se në rast se insistohet për trafikimin e këtyre marrëveshjeve do ta thellojë krizën në vend. Po kërkojmë nga koalicioni të mos shkoj kësaj rruge dhe të kthej pamjet e krizës. Situatat është serioze. Duhet t’i gjejmë një dalje këtyre marrëveshjeve ajo është shkuarja në zgjedhje. Situata bëhet shumë e komplikuar nëse insistohet këto marrëveshje të kalohen me trafikim. Është momenti me kërku dalje jo kthim në gjendjen e mëhershme. Shqetësimi për këto tema është vetëm i opozitës por dhe i qytetarëve”, tha Haradinaj. /tesheshi.com/
