Nuk la gurë pa lëvizur vetëm e vetëm që të marrë pozitën e zv.kryeministrit të Kosovës. Dhe ja arriti. Bëhet fjalë për biznesmenin Ramiz Kelmendi i cili së fundmi u bë edhe anëtari më i ri i LDK-së.
Aderimi në këtë parti, bëri që Isa Mustafa ta marrë si zëvendës Kelmendin. Ky i fundit në vazhdimësi pohonte se arsyeja pse e dëshiron postin e zv.kryeminsitrit është të jap kontributin e tij si njohës i ekonomisë për zhvillimin e vendit.
Por pikërisht në ditën që Kelmendi po festonte arritjen më të madhe në karrierën politike, policia po bastiste bizneset e tij në Pejë.
Ai pritet të përballet me drejtësinë për dyshim se ka rrezikuar jetën e qytetarëve me mish pa afat.
Në qendrën tregtare ETC dhe fabrikën e përpunimit të mishit “ELKOS” në këtë qytet, javën e kaluar, forcat e rendit kanë gjetur 6 mijë e 600 kg mish pa afat e të cilit nuk i dihej as prejardhja, raporton gazeta fjala.
Zv. kryeministri Kelmendi nuk ka dashur të thotë asnjë fjalë për rastin në fjalë.
Ndërkaq, në Agjencinë e Ushqimit dhe Veterinës kanë thënë se lënda rreth kësaj çështjeje do të procedohet në gjykatë, dhe policia do ta trajtojë këtë rast.
Ndryshe, ky nuk është rasti i vetëm kur qytetarëve u ofrohet në treg mish me prejardhje dhe afat të dyshimtë. /tesheshi.com/
