Nga Ahmet Zani
Ky është Ramiz Alia, 65-vjeçari laçian që mban emrin e ish-pasardhësit të Enver Hoxhës përgjatë sistemit komunist. Eshtë i lindur në Vinjoll të malësisë kurbinase, në vargmalet e Skënderbeut. Afro një vit më parë ka lënë profesionin e tij si mësues prej 30 vitesh dhe është pensionist.
Për prezantimin mediatik të Ramizin, ish-mësuesit nderuar, protagoniste u bë një banore e qytetit të Laçit, e cila disa ditë më parë lexoi tek portal tesheshi.com për Sali Berishën nga Mamurrasi. Ishte Valentina Keqi ajo sygjeroi që të shkruhet diçka për Ramiz Alinë në Laç, mësues Ramizin pra.
Ramiz Alia i arsimit kurbinas, ka dhënë lëndën e matematikës dhe fizikës, duke u njohur si një arsimtar mjaft impenjativ.
Dhe nuk ishte e vështirë të takoheshim me të, pasi ishte i njohur në Laç si njeri i nderuar që renditej ndër mësuesit më me përvojë në Kurbin, dhe ku të gjithë e thërrasin “profesor Ramizi”.
Ai menjëherë na fton në shtëpinë e tij. Është dita e tretë e Kurban Bajramit dhe të thotë se, edhe për këtë arsye shtëpia është e hapur për miq, pasi priten vizita urimi sipas traditës. Duke biseduar me të, të shpjegon se nuk është ndjerë fort mirë nga emri Ramiz Alia.
“Unë nuk jam përzier asnjëherë me politikë, kam punuar me pasion në profesionin tim si mësues në disa shkolla të Kurbinit, sigurisht jam përballur dhe me vështirësi. Më e vështirë për mua ishin kohët e e rinisë kur për katër vite rradhazi përshkoja tetë orë rrugë në këmbë nga fshati Vinjoll në Laç në ndjekjen e gjimnazit. Ishte sakrificë e madhe. Udhëtim i mundimshëm nëpër male për të ndjekur studimet, dhe më e vështirë stina e dimrit pasi zona jonë izolohej nga dëbora. Fshati ynë ishte i varfër. Na mungonta gjithçka, por unë isha i vendosur të përfundoja shkollën e mesme në Laç dhe ja arrita dhe më pas të përfundoj dhe të lartën. Më emëruan mësues në shkollën e fshatit tim Vinjoll për disa vite dhe në vitin 1994 jam larguar në emigrim për rreth katër vite duke mos u kthyer më në vendlindje, ndonëse aty kam shtëpinë dhe arat”.
“Nuk kam ndonjë histori që duhet përshkruar ashtu si mendoni ju”, thotë Ramizi, që, duke patur parasysh takimin e Sali Berishës së Mamurrasit më atë të Tropojës, pra Partisë Demokratike, edhe ai të jetë takuar ndonjëherë me Ramiz Alinë e Tiranës.
Dhe ndryshe nga Sala i pak kilometrave më tutje, i cili e donte shumë adashin e tij të dyfishtë, ku dhe politikisht ishte ithtar i tij, duke qenë njëherësh dhe kundërshtar i flaktë i Edi Ramës, Ramiz Alia i Laçit është krejt tjetër njeri.
Ajo që ka dëshirë të rrëfejë, që në fakt e përmend i gjithë Laçi, si një akt parimor e fisnik i rrallë i “profesor Ramizit”, është rasti i refuzimit të një lëvizjeje, një transferimi.
“Kërkonin të më largonin si mësues nga fshati ku dhe banoja, e të më zëvëndësonin me një vajzë nga Miloti. Këtu unë kundërshtova pasi një vazjë nuk mund të përballonte vajtje- ardhjet në Vinjoll disa orë larg. Dhe nëse do të më largonin nga puna, do mbetesha krenar për të ruajtur vlerat e një vajze që mos sakrifikonte kaq shumë në jetë si mësuese.”
Bëhet fjalë për Flutura Frrokun nga Miloti.
Tashmë, Ramiz Alia ndihet krenar për familjen e tij si dhe vitet në arsim për 30 vite me rradhë. Miqtë e tij përreth as nuk e ndjejnë tingëllimin e emrit, që në realitet nuk ka asnjë lidhje me Ramiz Alinë ish-presidentin komunist. Për ta, ky i fundit, që nuk rron më, i vinte anash Ramiz Alisë së Vinjollit . /tesheshi.com/
