Deri dje ishte në një rrënim të plotë. Por vitet e fundit, falë një ndërhyrjeje restauruese fondamentale, është rikthyer plot shkëlqim.
Është fjala për një ndër xhamitë më të vjetra në Shqipëri, më të hijshme njëkohësisht, dhe me emrin më unik, xhamia e Gjin Aleksit në Delvinë.
Ky Ramazan shënoi për të kthimin në funksion të plotë, duke mos mbetur thjesht muzeal, siç ishte për shumë vite, njëherësh në degradim e pa funksionin bazë, adhurimin e Zotit, pra faljen e namazeve ditore.
Për një muaj rresht, aty u shtruan pothuajse iftare të natëpërnatshme, pasuar nga falja e teravive.
Po ashtu, që nga përfundimi i restaurimit, ajo është dyerhapur për namazet ditore.
Jashtë dhe brenda shkëlqen, si estetikisht e si funksionalisht. Kjo ka bërë që banorë të atyshëm, të fshatit Rusan, të afrohen dhe më shumë me këtë monument të rrallë të trashëgimisë fetare të zonës, për t’u bërë pjesë e natyrshme e saj, si besimtarë të rregullt.
U pa kjo pikërisht këtë Ramazan, ku iftaret financoheshin dhe organizoheshin prej tyre.
Por ky efekt fetar do ishte i pamundur pa restaurimin cilësor që iu bë, ku njeriu kryesor që udhëhoqi punimet dhe që u përkujdes për to qe restauruesi elbasanlli Enver Samuri, dikur imam në Sarandë. /tesheshi.com/
