Nga Blendi Gashi
Shumë emra janë duke u përmendur si kandidatw konsensual për president të Kosovës, njëherit si kundër kandidat Hashim Thaçit, kreut të PDK-së.
Emri më i ri i përfolur është ai i Ramadan Zejnullahut, rektorit aktual të Universitetit të Prishtinës.
Deputetja e LDK-së Vjosa Osmani është ajo që ka bërë propozimin duke thënë se Zejnullahu ka dëshmuar se është një personalitet që mund t’iu bëj ballë presioneve politike.
Njohësit e rrethanave politike në vend kanë mendime të ndryshme sa i përket propozimit të bërë nga Osmani, edhe pse e vlerësojnë lart figurën e Zejnullahut, derisa opozita thekson se nuk flet për emra të përveçëm.
Analisti politik, Leon Duhanaj thotë se Zejnullahu, është vërtet një intelektual i cili do t’i bënte nder institucionit të presidentit.
Duhanaj në një prononcim për tesheshi.com ka thënë se Zejnullahu është një nga figurat e kualifikuara që ka Kosova për postin e presidentit dhe njëkohësisht një garantues për performancë të mirë.
“Ai (Zejnullahu) madje ka dhënë edhe deshmi, se është këmbëngulës në atë që beson. Por kur flitet për kandidat për President, mund të flitet për konsensual por që një gjë të arrihet në skenen politike kosovare, duket mision i pamundur, me përjashtim nëse imponohet nga çarqe ndërkombëtare. Për ndryshe nuk mund të presim ndonjë gatishmëri të tillë”, thotë Duhanaj, për tesheshi.com.
Duhanaj, mendon se Kosova në vazhdimësi do të perballet me probleme të tilla derisa të bëhen ndryshimet e duhura në sistemin zgjedhor dhe presidenti të zgjidhet përmes zgjedhjeve të drejtëpërdrejta.
Politologu Nexhmedin Spahiu thotë se nuk mund të jap një përgjigje të saktë nëse Zejnullahu do të ishte president konsensual dhe i pranuar si për pozitën ashtu edhe opozitën.
“Propozimi i Vjosës është propozim i saj dhe ndoshta e sheh si figure konsensuale. Unë nuk e di, nuk guxoj me u lëshu në gjykimin nëse ai (Zejnullahu) është figurë konsensuale për president apo jo.
Në rastin konkret është veç një zgjedhje teorike për shkak se pushteti ka kandidatin e vet. Dështimi i këtij kandidati sjell situata krejtësisht të reja. Në çafarëdo diskutimi për kandidat të tjerë të mundshëm paragjykohet dështimi i pushtetit që do të thoshte shkuarja në zgjedhje të reja”, ka deklaruar Spahiu për tesheshi.com.
Njohësi i rrethanave politike në vend, Donik Sallova edhe pse vlerëson rektorin Zejnullahu, nuk pajtohet me propozimin e bërë nga deputeteuja Osmani.
“Me gjithë respektin për Ramadan Zejnullahun, por të thuash se ai është kandidat konsensual për president, do të thotë të bësh deklarata për të marrë sa më shumë Like. Le ta bëjë një parti Vjosa Osmani me Zejnullahun, ky do të ishte veprim më real për ta dëshiruar Zejnullahun president. T’u kërkosh atyre që e bllokuan Zejnullahun në UP që tani ta zgjedhin atë president do të thotë të bësh politikë për Facebook. Prandaj nuk ju besoj pseudoiniciativave Osmani-Deda, sepse janë improvizime mediocre”, ka shkruar Sallova në Facebook.
Ja ç’thotë opozita për ‘Zejnullahun president’
Deputetja e AAK-së, Donika Kadaj-Bujupi e konaktuar nga portali tesheshi.com nuk ka dashur të flasë nëse Zejnullahu është apo jo figurë konsensuale për president duke thënë se nuk mund të japë opinion për individ të caktuar
“Kosova ka plotë njerëz të mirë dhe të duhur që do të mund të ishin presindet konsensual, por në këtë rast në emër të Aleancës dhe opozitës edhe një herë riktheksoj se ne nuk do të dalim me kandidat për president dhe nuk do të bëjmë kuorumin për Thaçin”, ka deklaruar deputetja Kadaj-Bujupi.
Sekretari i NISMA-s për Kosovën, Bilall Sherifi i pyetur nga portali tesheshi.com për propozimin e deputetes së LDK-së për president, ka thënë se parimi qëndron mbi çdo emër të përvetshëm.
“Për NISMA-n tanimë është përfundimtare. Presidentin duhet ta zgjedh populli sepse vetëm duke u zgjedhur me votë të drejtëpërdrejt nga populli ai do të jetë i popullit. Zgjedhjet e deritashme përmes kalkulimeve partiake kanë prodhuar president jo të besueshëm”, ka deklaruar Sherifi.
Ndryshe, si emra të mundshëm për president të vendit janë lakuar edhe emri i Murat Jasharit dhe Rexhep Qoses. I pari nuk është deklaruar, ndërsa ky i fundit ka thënë se nuk pranon propozime për mandate të përkohshme politike. /tesheshi.com/
