Tre deputetët e PDIU-së dhe Tom Doshi i PSD-së votuan pro zgjedhjes së Gramoz Ruçit si krytera i Kuvendit, por edhe për qeverinë “Rama2”.
Në kushte të tilla, kryeministri Rama veç votave të grupit parlamentar socialist do të ketë si mbështetje edhe 4 deputetë, duke e çuar momentalisht në 78 numrin total të ligjvënësve që mund të ngrenë kartonët pro nismave të qeverisë.
Deputeti i PDIU-së, Aqif Rakipi, shprehet se votat do të jenë pro qeverisë nëse ajo mban premtimet e bëra dhe zgjidh hallet e qytetarëve. Sipas tij, PDIU nuk ka qenë asnjëherë pjesë e tepsisë, përsa kohë në administratë nuk ka pasur as 1 % të posteve apo të të punësuarve.
Por, Rakipi kërkon nga Rama që të ketë në axhendën e punës së qeverisë, çështjen çame, për të cilën thotë se është interes i të gjithë shqiptarëve.
Ndërkohë, Tom Doshi, ish-deputet i PS në legjislaturën e kaluar, sot përfaqësues i PSD-së, thotë se partia e tij ka qenë gjithmonë në aleancë me socialistët. “E kam thënë edhe në fushatë që do të mbështes qeverinë Rama, madje mbështetje do të ketë edhe në zgjedhjet vendore. Vota ime do të jetë pro qeverisë në çdo nismë që do të sjellë”, tha Doshi.
Duket se besnikëria e 4 ligjvënësve, të cilët nuk janë pjesë e grupit parlamentar socialist, i jep më shumë siguri Edi Ramës, pasi edhe ndonjë qenfmbetje deputeti socialist, nuk rrezikon në asnjë moment stabilitetin e qeverisë. /tesheshi.com/
