Kryeministri Rama reagoi ndaj faktit se një Komisioner i Brukselit realizon videokonferencë me kreun e opozitës nën një atmosferë elektorale, siç ndodhi së fundi me Mariya Gabriel Komisioneren e BE-së për Edukimin, Inovacionin dhe Rininë.
“Dikush në Bruksel duhet t’u thotë komisionerëve që harxhojnë kohën e punës së paguar nga taksat e popujve të Evropës, për të bërë videomuhabete elektorale me Lulëzim Bashën, se kjo quhet ndërhyrje në fushatën e brendshme elektorale të një vendi kandidat për në BE!
Në dijeninë time Komisioni Evropian nuk e ka zakon të fusë hundët në fushatat elektorale dhe unë pres ta mësoj zyrtarisht e publikisht nga Brukseli, nëse e kam unë gabim e ndoshta komisionerët kanë vërtetë të drejtë të bëhen palë kur popujt e Evropës zgjedhin qeveritë e tyre”, ka shkruar Rama.
Më parë, e njëjta gjë ndodhi dhe me Komisionerin Johanes Hahn, i cili tashmë mbulon çëshjte të tjera dhe nuk ka peshën e dikurshme politike në diplomacinë europiane. /tesheshi.com/
