Kryeministri Edi Rama ka zbardhur një detaj nga marrëveshja historike me Bashën mesnatën e 17 majit duke gdhirë 18-ta, atë që nuk do jenë ndërkombëtarët përcaktues në zgjidhjen e ngërçeve politike.
“Ndërkombëtarë nuk do jenë më shkesë…”, tha Rama i ftuar në “Opinion”, i cili edhe pse shtoi se i vlerësonte, shprehu ndaj tyre kritika për mënyrën se si i qasen zhvillimeve shqiptare, gjithsesi jo pa faj sipas tij. Për Ramën, marrëveshja mbyll njëherë e mirë një cikël të lodhshëm krizash për shqiptarët.
Madje ai nuk e mohoi, e për më tepër e pohoi fort, se nuk e ka pranuar paketën McAllister. Për Ramën, ajo paketë ishte një bazë e mirë për ta diskutuar, por assesi për ta pranuar ashtu siç u ofrua. Për më tepër, në gjykimin e Ramës ajo kishte dhe një pikë që ngjante fyese për shqiptarët, shtyerja e datës së zgjedhjeve për më 26 korrik, duke bërë kështu që të shkelej ligji dhe Kushtetuta pa asnjë lloj hezitimi.
Nga ana tjetër, shefi i mazhorancës është shprehur kritik ndaj aleatit, që tashmë mund të quhet dhe “ish”, LSI. Sipas tij, kjo forcë ka vepruar me dy standarte në katër vite bashkëqeverisje: “vetëm të mirat i pranon si punë e përbashkët, ndërsa roblemet si defeti vetëm i yni”.
Dhe nga ana tjetër Rama nuk ka mohuar një mundësi bashkëqeverisje me PD-në pas zgjedhjeve. /tesheshi.com/
