Në një bashkëbisedim publik në Korçë, kryeministri Rama ofroi një zbarthim të fenomenit të ikjeve, që sipas tij, nuk janë as vetëm sot, e as nuk është problem vetëm shqiptar.
“Nuk e kam një arsye për të thënë pse nuk dihet ti të largohesh në formën e një predikimi. Mendoj se është në radhë të parë e rëndësishme që ne mos të harrojmë që nuk jemi në bunkerin e shokut Enver.
Nuk jemi në një fazë të parë të lëvizjeve të njerëzve nga Shqipëria, jemi në vitin e 30 apo 31 të krijimit të mundësisë për shqiptarët që të dalin jashtë vendit të tyre dhe të provojnë veten në vend e të tjera.
Shqiptarët kanë ikur deri në kohën kur pastaj u ndërtua bunkeri dhe u mbyllën me zor brenda. Ikin, do ikin, janë kthyer dhe do kthehen, trendet janë varur gjithmonë nga trendet historike. A janë vetëm shqiptarët dhe Shqipëria që përballen me këtë fenomen sot? Në fakt jo!”, tha Rama, duke ofruar dhe krahasimin me të djeshmen.
Ai vijoi arsyetimin e tij, duke i dhënë dhe të drejtë atij të riu që vendosë të ikë.
“E kuptoj një të ri nga Pusteci, apo Lekasi që thotë ‘dakord, i kuptoj të gjitha këto po unë jam 20 vjeç sa do pres unë dhe kë do pres që të jetoj sic jetojnë bashkëmoshatarët e mi në Gjermani’, dhe i kuptoj shumë mirë dhe s kam përgjigje tjetër vec se për t’i thënë se kjo është ‘zgjedhje jote’.
Dhe është ana komike e kësaj faze dramatike të vendit kur dëgjon disa, që s’po u përmend emrin që mos prishim atmosferën që thonë se do ta zgjidhin ata këtë punë.
Kjo është diçka që është me kohën që jetojmë, e kanë vuajtur e vuajnë sot edhe vende të BE, është një dhimbje e kësaj kohë. Është fjala për ta parë realitetin në sy dhe nëse duam që ata që janë sot më të vegjël të mos kenë pyetjen, sot të bëjmë gjërat e duhura e të jemi të vetëdijshëm se nuk ka shkop magjik.
Nuk mundet Shqipëria të ofrojë atë që ofron Gjermania. Ka limite. Ama duhet të bëjmë akoma më shumë. Po çfarë? Marrim Korçën: kur ishim në opozitë, në qytetet tona nuk bëje dot një fotografi pa Rilindjen Urbane”, arsyetoi Rama. /tesheshi.com/
