Kryeministri Rama i ka përfshirë objektet e kultit tek një kategori e privilegjuar përsa i përket pagesës së energjisë elektrike. Duke legalizuar kishën e Shën Athanasit në Selenicë, shefi i qeverisë tha se nuk ka pse këto objekte të paguajnë njësoj si të ishin biznese
“Ne do bëjmë një ulje të tarifës së energjisë për të gjitha objektet e kultit, sepse në fund të fundit janë familje besimtarësh dhe do paguajnë si familje. Kjo besoj do lehtësojë shumë nga ana financiare gjithë institucionet e kultit”, tha Rama.
Më pas, Rama vendosi të shpotisë opozitën në stilin e tij, sa i përket legalizimeve, ku akuzon kundërshtarët politike për zvarritjen e procesit “Erdhëm t’i japim lejen e legalizimit edhe kishës suaj. Kemi mbi 1 mijë objekte kulti që janë pa letra. Habitem se mund të kishin bërë edhe ndonjë legalizim kishe a xhamie, që të paktën të lanin shpirtin për nja një javë, se iu bë katran nga mëkatet dhe nga ryshfetet. Por nuk i bënë ato,” – u shpreh Rama. /tesheshi.com/
