Kryeministri Rama u votua në Kuvend edhe si ministër i ri i Jashtëm, një hap i diktuar nga refuzimi që presidenti Meta i bëri Gent Cakajt, për të qenë ky emër në krye të diplomacisë shqiptare.
Në seancë morri pjesë dhe opozita, ku pas disa mesazheve, vendosi ta braktisë atë.
Ishte kreu demokrat Basha ai që tha se ministrat e rinj nuk i njihte kush.
“Cilët janë emrat e ministrave të rinj? Zero! Bëri sikur imitoi Ismail Qemalin, po doli si Enver Hoxha. Nivelin e kabinetit të Surrelit e ka të nivelit të Lenka Çukos. Bilancin e paguan populli, qytetarët dhe pensionistët. Vendi është në emergjencë kombëtare…”, tha Basha.
Ndërkohë, mes replikave të shumta, shefi i qeverisë zgjodhi të kujtojë 21 Janarin.
“Sot është 21 janari, këta vranë 8 vite më pare. Këta vijnë këtu dhe janë ende të karikuar nga ideja se drejtësia nuk do të vijë. Mendojnë se do të vazhdojnë të pengojnë edhe të përmbysin reformën në Drejtësi që është pa kthim. 21 janari plagë e hapur dhe e pagjykuar. Ata që duhet të përgjigjeshin janë të pandëshkuar, por sot është ndryshe Shqipëria nga çfarë ishte vjet. Gjykatësit e 21 janarit janë rrugëve, e nesër mund të jenë prapa hekurave. Drejtësia e re është që ata që janë të padenjë, nesër të jenë të akuzuarit e drejtësisë”, tha Rama. /tesheshi.com/
