Kryeministri Rama ka publikuar foton e takimit të radhës me Erdogan në Ankara, pa e shoqëruar me ndonjë koment.
I pari i qeverisë shqiptare ndodhet në kryeqytetin turk për një vizitë e cila nuk dihet zyrtarisht se çfarë ka në fokus si çështje kryesore.
Herën e fundit që Rama qe në Turqi ishte prezenca e tij në Konia, në Lojrat Islamike.
Siç dihet tashmë, mes dy udhëheqësve ka një raport të ngushtë edhe përtej një miqësie tradicionale turko-shqiptare.
Për Ramën, siç do deklaronte pak ditë më parë, është një fat që në këtë kohë të kesh një aleat si Turqia, duke nënkuptuar me këtë lidhjen e ngushtë me presidentin turk.
E gjithë qeverisja e tij, që nga mandati i parë, është karakterizuar nga mbështetja e fortë turke, një mbështetje që më pas ai e ka patur si në krizën tërmetore e si në krizën pandemike. Pritet ta ketë dhe tashmë dhe në atë energjitike.
Por ky raport i ngushtë i tyre duhet parë dhe në dritën e rendit të ri global, diktuar dhe nga fakti i rikthimit të Turqisë si fuqi botërore.
Ndryshe nga të gjitha qeverisjet e deritanishme në post-komunizëm, kjo e Ramës ka si sfidë dhe shahun e detyruar gjeopolitik për t’u luajtur.
Sot nuk është më në rend të parë cilësia e tij qeverisëse, por se si do ta pozicionojë Shqipërinë në rendin e ri, pra në hartën e re botërore, mes fuqive apo ndryshe mes Perëndimit dhe Lindjes së afërt. /tesheshi.com/
