Nga Kavaja, kryeministri Rama e pati për kenaqësi ligjërimore gjetjen krahasimore mes tij & Co dhe gomëreve.
“Të shkosh të ngarkosh dru, të kesh alamet gomerësh si puna jonë e të marrësh qen të ngarkojnë dru, nuk bën vaki. Qeni nuk ngarkon dot dru. Se në vend të ngarkosh dru ha edhe ndonjë kafshim pastaj. Kjo është historia e thjeshtë, kush i ngarkon drutë dhe kush i çon në vend. Për këtë është vota”, tha kryeministri Rama, duke e sjellë gomarin në një tjetër kontekst politik, atë të dobisë si kafshë bartëse.
Gjithashtu, duke iu përshtatur Kavajës si një qytet e zonë me traditë besimi islam, si dhe faktit që është Ramazan, ai përmendi një thënie të Profetit Muhamed, duke e plotësuar me frazën fetare pas përmendjes së këtij emri të madh të përcjelljes së kumtit hyjnor të Zotit për njeriun – Paqja e Zotit qoftë mbi të! – duke thënë se ka vlerësuar mbjelljen e pemëve, siç socialistët po bëjnë në këtë fushatë.
“Kush mbjell një pemë….ka bërë një gjë të madhe”, tha Rama në një përpjekje që të citojë Profetin Muhamed.
Në fakt është i pasaktë, ndonëse në thelb është vërtet kështu.
Profeti ka thënë përafërsisht: “Nëse keni një fidan në dorë për ta mbjellë dhe shihni se po bëhet Kiameti, mbilleni!”. /tesheshi.com/
