Universiteti Bujqësor i Kamzës do të përjetojë ndryshime drastike në të mirë të studentëve dhe mësimdhënies. Kështu u shpreh kryeministri Edi Rama, i cili kishte zgjedhur të uronte stafin pedagogjik dhe studentët e këtij universiteti me rastin e nisjes së vitit të ri shkollor.
Referuar situatës së një viti më parë, Rama tha se ishte shokuar kur ka parë se në ambientet pranë kishte më shumë kafe se sa auditorë dhe e gjithë hapësira ishte një katrahurë.
“Zgjodhëm ta uronim fillimin e vitit të ri akademik, në këtë universitet pasi dëshirojmë që këtu të vazhdojmë t’i hapim rrugë një procesi transformimi rrënjësor. Bashkë me disa pedagogë vizituam kantierin e universitetin. Pedagogët janë të kënaqur, unë jo shumë, pasi ka ende shumë punë për t’u bërë. Do jetë një oaz i mrekullueshëm ku natyra dhe e gjithë infrastruktura të jetë në harmoni të plotë. Këto fjalë mund të tingëllojnë utopi, por ju siguroj se studentët që janë sot në vitin e parë, do e shohin që këto fjalë do të transformohen në realitet. Përpara një viti ishim këtu dhe s’u besoja syve se çfarë katrahure ishte kjo hapësirë. Me një ndërhyrje të parë është krijuar një bazë për të vendosur rregull. Nuk do ketë asnjë aktivitet nëse nuk është në harmoni me ato të studentëve. Këtu nuk mund të ketë më shumë makina se njerëz. Këtu nuk mund të ketë makina që vendosin të parët mbi njerëzit, apo nuk mund të ketë më shumë kafene se aula. Këtu nuk mund të ketë një udhëkryq, këtu duhet të ketë vetëm studentë. Nuk mund të hyjë dhe të dalë askush këtu si të dojë. Këtu ka shumë për të bërë. Këtë territori ta kthejmë në një oaz”, tha Rama. /tesheshi.com/
