Kryeministri Rama zbarkoi në Jalë, aty këto ditë po bëjnë plazh dhe politikë dy kampet rinore të majta, ajo e LSI-së dhe ajo e PS-së. Rama ishte tek kjo e dyta, ku u takua pra me të rinjtë e FRESSH-it, të cilët marrin pjesë në platformën “FRESSH Voice”.
Para tyre, Rama ka mbrojtur idenë se Shqipëria po ka një rritje ekonomike, si dhe atë se përse koncensionet, të cilat ai i quan partneritet publik-privat, janë të domsdoshme.
“Rritja e ekonomisë sot është fakt. Morëm një ekonomi që rritej rreth zeros dhe sot, këtë vit shkojmë përtej 3 %. Por jemi të vëtëdijshëm që 3.4%, 3.5% apo 4 % po të doni, nuk është një rritje ekonomike e atillë që ta ndjejnë njerëzit në xhepin e tyre, në kushtet që jemi ne sot. Po a ka një mundësi që t’i rrisim rrogat, t’i bëjmë nga 800 euro shqiptarçe dhe ndërkohë ne të vazhdojmë? Nuk ka, nuk ekziston! Pra nuk ekzistojnë magjira”, tha Rama.
Dhe më tej, iu kushtua asaj që konsiderohet njolla më e madhe e kësaj qeverisjeje, konçensionet:
“Çfarë nënkupton kjo? Privati do investojë aty atë që ti nuk e investon dot. Nëse një partneritet me privatin do të rëndojë taksapaguesit, përkundër të njëjtin shërbim, kjo është kriminale. Por nëse partneriteti me privatin do të garantojë një investim që shteti nuk është në gjendje ta bëjë dhe do të rrisë cilësinë e shërbimit atëherë kjo është e domosdoshme”, u shpreh kreu i qeverisë, i cili, ndërsa tenton të sqarojë opinionin mbi disa problematika qeverisëse, ende nuk ka deklarime sqaruese mbi përhapjen e frikshme të kultivimit të kanabisit.
Dy vjet e gjysëm pas Lazaratit, miti i një qeverisjeje anti-kanabis pothuajse ka rënë. /tesheshi.com/
