Plotësohet gjeografia e investimeve turke në energjitikën shqiptare, duke i dhënë një formë gjithnjë e më gjithëpërfshirëse nga veriu në jug.
Pas Skavicës dhe hidrocentraleve mbi Fan dhe Mat, qeveria shqiptare i ka dhënë një konsorciumi shumë të fuqishëm turk hidrocentralin që do të ngrihen në pikën fundore të Vjosës.
Bëhet fjalë për HEC-in që do të ngrihet në Poçem të Mallakastrës, pikërisht aty ku Vjosa bëhet gati për t’u derdhur në Detin Adriatik.
Ajen Enerji dhe Cinar San Turizm kanë formuar konsorciumin që do të investojë në jug të vendit për t’i dhënë energjitikës shqiptare veprën e tretë të rëndësishme të jugut pas Bistricës të ndërtuar në sistemin komunist, dhe asaj të Banjës që po ndërtohet nga kompania shtetërore norvegjeze e energjisë.
Ajen Enerji është një kompani shumë e fuqishme që në Turqi dhe gjithë botën merret me ndërtimet e hidrocentraleve, por ka marrë famë të madhe edhe si ndërtuese e centraleve të erës që është dhe tenkologjia më e fundit që respekton mjedisin.
Totali i energjisë që kjo kompani prodhon vetëm në Turqi është 259.61 miliard kilovat orë vetëm në vitin 2015.
Ajen Enerji është shtrirë në Ballkan, jo vetëm në Shqipëri por edhe në Serbi dhe Slloveni në ndërtimin e hidrocentraleve.
Ndërkaq, Cinar San Turizm është një kompani e famshme turke që merret me ndërtimin e digave të mëdha dhe masiveve ujëmbledhëse. Ajo ka ndërtuar diga në të gjithë botën.
Në lumin e Vjosës do të ndërtohet një hidrocentral me fuqi të instaluar 99.5 megavat.
Hidrocentrali i Poçemit ka një vlerë investimi të parashikuar mbi 100 milionë euro dhe pritet të prodhojë 305 milionë kilovat orë energji në vit.
Sipas marrëveshjes paraprake, afati për ndërtimin e tij është 36 muaj pas marrjes së lejes së ndërtimit.
Lumi Vjosa konsiderohet si i dyti për rrëmbyeshmërinë pas Drinit, çka ka shumë hidroenergji për të prodhuar rrymë elektrike.
Një hidrocentral tjetër i madh në Drin pritet të ndërtohet edhe Katundi i Ri, apo Skavica, që i është dhënë një kompani tjetër të rëndësishme turke. Të gjitha pritet të prodhojnë energji në harkun kohor 2017-2018.
Përgatiti: Ylli Pata – /tesheshi.com/
