Në një aktivitet të quajtur Olimpada e Aftësive, kryeministri Rama promovoi sërish rëndësinë e marrjes së një zanati, më shumë se atë të marrjes së një diplome universitare.
“20% më shumë është mundësia e punësimit e atyre që kryejnë arsimin profesional në krahasim me ata që e kanë një diplomë universiteti. Kjo lidhet dhe me cilësinë mizerabël të shumë diplomave të universiteteve të së shkuarës dhe tanimë të mbyllura, por nga ana tjetër lidhet dhe me urinë e madhe që ka tregu i punës për zanatçij, profesionistë”, theksoi kryemnistri.
Sipas tij, është e pafalshme që në një vend në zhvillim si Shqipëria, nuk ka profesionistë të zanateve të ndryshme.
“Kjo mungesë dramatike e kaq shumë zanateve e profesioneve në një vend që është në zhvillim, do të thotë as më shumë e as më pak po një vend që ecën jo mbi dy këmbë, po vetëm me një këmbë. Përpjekja jonë për ta bërë vendin të ecë mbi dy këmbë, në kuptimin e arsimimit dhe formimit të të rinjve, ka nisur që në ditën e parë të mandatit të pare…”, shtoi Rama. /tesheshi.com/
