Një lajm i mirë për të gjithë punonjësit e administratës publlike. Vitin e ardhshëm rrogat e tyre do të rriten, ndërsa ajo minimale nga 220 mijë lekë, do të shkojë deri në 37.500 lekë. Ky fakt u konfirmua nga vetë kryeministri Edi Rama, gjatë prezantimit të planit për modernizimin e administratës shtetërore.
“Paga e ulët, nga 220 mijë lekë të vjetra që e kemi aktualisht, me këtë paketë e çojmë në 375 mijë lekë të vjetra. A është është mjaft, jo nuk është. Duke filluar nga poshtë rritjen, ne kemi një piramidë pagash në administratë tërësisht të re. Nëse një specialist i kategorisë së tretë e ka sot pagën aktuale 355mijë lekë, rritja shkon në 379 mijë lekë dhe kështu në mënyrë progresive kemi një rritje e cila kur vinte paga bruto bëhet 589 mijë lekë. Natyrisht nuk është sërish mjaft, por është shumë më tepër se çështë. Nga 1 marsi i vitit të të ardhshëm të gjithë ju do të keni një pagë më të mirë”, -u shpreh Rama.
Sipas tij, qeveria ka vendosur që të shkëpusë nga buxheti i shtetit në atë të familjeve shqiptare 100 milionë dollarë, për të rritur rroga e pensionet. Nga ana tjetër, Rama shfrytëzoi rastin për t’i dhënë përgjigje akuzave të kreut të opozitës, Lulzim Basha se qeveria gjatë vitit të ardhshëm ka në plan të rrisë taksat.
“Janë përralla pretendimet e opozitës se qeveria ka rritur taksat. Në rreth 3 vjet e gjysmë kjo qeveri ka bërë shumë më tepër se qeveria e kaluar në 8 vjet, duke shpenzuar 540 milionë dollarë për fuqinë blerëse”, tha ai.
Sa i takon proçesit të konkurrimit për një vend pune në administratë, kryeministri thotë se sistemi i rekrutimit bëhet sipas meritës dhe të jep mundësi të bësh karrierë. Duke folur me shifra, ai pohoi se janë më shumë se 52 mijë kërkesa për aplikime për punë në administratën publike.
“Proçesi i rekrutimit në administratë është shprehje e vullnetit për t’u ndarë nga e kaluara. Sot ka mundësi për të bërë karrierë në bazë të meritës. Sot numri mesatar i aplikantëve është 13, ndërkohë që më parë ka qenë 4, sa minimumi”, deklaroi kreu i qeverisë./tesheshi.com/
