Kryeministri Edi Rama zhvilloi një takim me atë që e quajti “skuadër kombëtare” të negociatave për anëtarësim në Bashkimin Europian, ku u shpreh ndër të tjera se për asnjë çështje të drejtësisë nuk bëjmë asnjë lloj kompromisi me askënd. Me këtë la të nënkuptohej se pavarësisht presionit grek për Belerin, nuk do kishte dot ndërhyrje në çështjet e drejtësisë.
“Ju e dini që kemi një problem që nuk lidhet fare me punën tuaj e procesin e negociatave por që lidhet me
politikën dhe marrëdhëniet politike. Besoj se nuk duhet të keni asnjë shqetësim dhe besoj shumë se nuk do të kemi asnjë humbje kohe sepse do të gjejmë gjuhën edhe për këtë, gjithmonë me mirëkuptimin që në asnjë çështje të drejtësisë dhe për asnjë çështje të drejtësisë ne nuk bëjmë asnjë lloj kompromisi me askënd dhe për asnjë arsye”, u shpreh Rama.
Nga ana tjetër, Rama shprehu bindjen se “me fqinjët tanë ne do të arrijmë së bashku që të vendosim arsyet madhore mbi këtë çështje që nuk ia heqim rëndësinë që ka për fqinjët tanë dhe për të cilën patjetër ne jemi disponibël për çdo gjë që nuk prek procesin e konsolidimit të sistemit tonë të ri të drejtësisë”.
“Këtu nuk ka asnjë kompromis të mundshëm, jo se nuk duam ne, por sepse drejtësia që ne duam është shumë më kokëfortë se sa ne. Puna juaj dhe puna jonë e përbashkët do të vazhdojë. Ju tanimë e keni mësuar rrugën për në Bruksel dhe ju e dini si shkohet e çfarë duhet të bëni atje”, arsyetoi kreu i qeverisë. /tesheshi.com/
