Rama thotë në Himarë atë që s’e ka thënë kurrë…

Kryeministri Rama ishte në Himarë, për çështjen më të nxehtë, atë të pronave. Dhe, si nip Bregu, nga Vunoi, zbuloi se dhe vetë ka prona aty, nga e ëma, fakt të cilin e shfrytëzoi për të thënë se e njeh mjaft mirë realitetin e atyshëm të pronave.

“E njoh mirë unë këtë zonë, e njoh, e kam në gjak, ia di të tëra historitë. Mund të flisni ça të doni me ndonjë që vjen nga Durrësi dhe nuk di se çfarë bëhet. I di dhe konfliktet brenda për brenda familjeve. Unë vetë dhe e ndjera ime më, nuk kemi kërkuar kurrë asgjë. Ju e dini mirë se ku e kemi rrënjën këtu, por nuk kemi kërkuar asgjë. Asnjë metër katror. Por nuk është se nuk e di historinë dhe të pronës sonë atje”, tha Rama, duke dorëzuar disa çertifikata pronësie.

Po aty, politikisht ai shpalli se “himariotët janë himariotë dhe pike”.

“Secili e di vetë se ku i ka rrënjët. Ne nuk i ndajmë shqiptarët dhe jo të ndajmë himariotët. Kush ju thotë diçka tjetër, shiheni mirë se pse e thotë. Shqiptarëve nuk ua ha qeni shkopin, se nuk ua fut njeri në politikë. Kanë pasur të bëjnë me lloj lloj marifetesh. Mes shqiptarëve, himariotët janë njësha, për politikë jo lokale por globale”, shtoi kryeministri. /tesheshi.com/