Kryeministri Rama vizitoi në spital policen së cilës iu këputën gishtat e dorës nga kapsollat e protestuesve të Unazës së Re, të cilët, nga zona e “Astirit” u zhvendosën para parlamentit.
“Çdo prind dhe çdo familje e përfytyron se çfarë do të ndjente nëse vajza 24-vjeçare do të kthehej në shtëpi pa gishtat e dorës të këputur pasi ka dalë në mëngjes nga puna për të kryer detyrën. Kjo është një situatë që nuk ka ndodhur në Shqipëri qysh kur kanë filluar prishjet masive për interes publik që nga parku “Rinia” e me radhë pavarësisht kush ka qenë në qeveri, është hera e parë që një parti politike merr përsipër që bashkë me një grup njerëzish, ku një pjesë janë zaptues profesionistë trojesh dhe një pjesë tjetër janë të ngatërruar dhe të keqkuptuar pa lidhje kundër interesit publik për të frenuar zhvillimin e një vepre që nuk kanë për ta frenuar dot.
Dhe prerja e gishtave të vajzës është një vijë e kuqe që është vendosur sot mes atyre që kanë marrë përsipër t’i kundërvihen ligjit dhe policisë së shtetit që është në mbrojtje të ligjit dhe në mbrojtje të interesave publike dhe të komunitetit. Nuk ka shans që ligji të mos zbatohet njësoj për të gjithë dhe nuk ka shans që policia e shtetit të kthehet në target për kapsollat, për gurët apo kërcënimet e një grupi njerëzish që duhet të largohen që aty”, tha Rama, që ndërkohë, teksa fliste, u tentua të goditej me këpucë nga një protestues.
Megjithatë, ai tentoi të sqaronte dhe njëherë të gjithë ata banesat e të cilëve do u prishen.
“Ato që kanë letrat e pronës do të dëmshpërblehen si të gjithë në Republikën e Shqipërisë gjatë gjithë viteve, qofshin me titutj të vjetër, qofshin dhe të legalizuar ashtu si janë legalizuar, kjo nuk ka rëndësi sepse zbatohet ligji. Ata që janë aty me një strehë dhe nuk kanë gjë tjetër do të marrin bonus qiraje 3 vjet si gjithë të tjerët në këto raste, bonus qiraje që nuk e merrnin kurrë para 2013 dhe e merrnin pas 2013. Dhe të tjerët duhet të largohen sa më parë se nuk do të marrin absolutisht asnjë gjë. Përkundrazi sa më shumë i bien ndesh ligjit, aq më shumë do të përballen me ligjin”, tha shefi i qeverisë. Presidenti Meta dënon aktet e dhunshme dhe u bën thirrje të gjitha palëve të distancohen menjëherë nga dhuna dhe të bëjnë maksimumin për të shmangur konfliktin dhe gjuhën së forcës së përdorur në këtë çështje.
Ndërkohë, ka ndërhyrë dhe presidenti Meta me një deklaratë, ku ndër të tjera thotë:
“Presidenti Meta gjen rastin t’u bëj apel sërish institucioneve shtetërore të zbatojnë me përpikëri procedurat ligjore dhe kërkon urgjentisht rivendosjen e dialogut me banorët e prekur nga ky projekt për të gjetur një zgjidhje të drejtë për të gjithë qytetarët dhe interesin publik”. /tesheshi.com/
