Tritan Shehu, ish-ministër i Jashtëm, një zë nga PD që bën hera-herës ekspertin e diplomacisë, ndonëse vjen nga mjekësia, ka sulmuar ashpër kryemnistrin Rama pas një foto të publikuar nga ky i fundit, ku shfaqej me liderin turk Erdogan, i ftuar nga njeriu i fuqishëm i Bosforit në rezidencën e tij verore në Marmaris.
Me një gjykim bardh e zi, Shehi e lexon, e njëherësh e interpreton raportin Rama-Erdogan, si një prirje të shefit të mazhorancës për t’u lidhur, siç thotë, me despotë lindorë.
“Rama gjatë krizave vrapon në Lindje. Rama e ka futur Shqipërinë në një krizë të thellë të demokracisë, drejt një despotizmi lindor, duke u larguar çdo ditë me shpejtësi nga vlerat e mëdha perëndimore”, shkruan Shehu, ndërkohë që nga kampi i tij politik Perëndimi shihet vëngër e keqgjykohet si mbështetës i njëanshëm i kryeministrit shqiptar.
Duke përzier urrejtjen tipike ndaj kundërshtarit politik me një lloj turkofobie, Tritan Shehu sheh, e po ashtu intepreton praninë e Ramës në rezidencën e Erdoganit por jo vetëm, përfshirë pra raportin e tyre të afërt gjatë viteve të fundit, edhe si një kthim, sipas tij fatal, në periudhën osmane.
“Prandaj shqiptarët rrezikohen që në vend të integrimit, të largohen nga familja jonë europiane, për të ngelur peng të Lindjes. E kemi provuar dy herë në histori këtë tragjedi, gjatë pushtimit otoman dhe gjatë atij komunist”, shkruan Shehu, duke vënë shenjë barazimi mes një perandorie ngritur mbi konstrukt fetar, e një sistemi idelogjik.
Kohë më parë, do ishte një tjetër ish-ministër demokrat, personazh i njohur i kampit opozitar, Dashamir Shehi, cili do sulmonte ashpër Ramën se pse preferon investime turke në Shqipëri. /tesheshi.com/
