Është zhvilluar në Bruksel takimi i nivelit të lartë mes Kryeministrit shqiptar dhe vendet anëtare të BE-së, ku është konfirmuar hapja e negociatave me Bashkimin Europian.
Takimi është kryesuar nga Shefja e diplomacisë së BE-së, Federica Mogherini dhe Komisioneri për Zgjerimin Johanes Hahn.
Delegacionin e Shqipërisë e ka kryesuar Kryeministri Rama, i cili pas përfundimit të takimit shkruan në rrjetet sociale se përfundimi ka qenë pozitiv.
“Sapo përfundoi në Bruksel mëngjesi i punës me vendet anëtare, iniciuar nga grupi i Miqve të Shqipërisë në Këshillin e BE-së, ku u fol me tonet më pozitive për Raportin e Progresit dhe u konfirmua vullneti i vendeve anëtare për mbështetjen e rekomandimit pozitiv të Komisionit për çeljen e negociatave për anëtarësimin e Shqipërisë në Bashkimin Europian.
U nënvizua nga të gjitha vendet anëtare progresi i madh që pasqyrohet në Raportin e Komisionit; ecuria mbresëlënëse e reformave; respekti i veçantë për politikën rajonale të Shqipërisë; nevoja imediate për zbatimin e Ligjit të Vetingut si premisë e mirëkuptuar apo kusht i natyrshëm për ecurinë e këtij procesi historik.
Falenderim i veçantë për Shefen e Diplomacisë Europiane Federica Mogherini dhe për Komisionerin Johannes Hahn, dy miq të posaçëm e partnerë të çmuar të Shqipërisë në këtë process”, , shkruan Rama në faqen e tij në FB.
Ndërkaq, komisioneri për Zgjerimin Johannes Hahn, shkruan në faqen e tij në twitter, se “Kryeministri Edi Rama konfirmoi angazhimin e tij që kushti motivues për rekomandimin do të japë rezultate konkrete në zbatimin e reformës për drejtësi.
Miqtë e Shqipërisë janë takuar sot në Bruksel dhe të gjithë pjesëmarrësit kanë përkrahur Shqipërinë për hapjen e negociatave”./tesheshi.com/
