Kryeministri Rama ka zgjedhur t’i ftojë në “shtëpinë e tij”, në kryeministri, një grup të madh maturantësh, nga ata që janë kapluar nga ankthi e zemërata për mosfitimin e asnjë dege deri më tani, paçka mesatares mbi 9; ndërkohë që një pjesë tjetër protestonin para godinës qeveritare, edhe me pankarta ku aludohej për kryeministër të korruptuar.
Rama, në një fjalim që ka mbajtur para atyre që ishin brenda sallës së madhe të Kryeministrisë, është rrekur që t`i sqarojë dhe njëherë për sistemin e ri të përzgjedhjes në kuadër të reformës në Arsim, duke këmbëngulur në avantazhet e tij në krahasim me atë të mëparshmin.
Ai garantoi që deri më datë 16 tetor, do ketë përfunduar dhe raundi i dytë i përzgjedhjes, ku sipas tij, shumë nga ata që sot janë zhytur në dëshpërim, do kenë degën e dëshiruar.
Shefi i qeverisë shqiptare i ka mikluar me komplimenta duke i quajtur “koka të mëdha”, për çka përmendi fakti se si ish-kryetar bashkie, është i pari qeveritar që ka vendosur të shpërblejë me bonuse nxënësit ekselentë.
Më pas, ka qenë ministria e Arsimit, Lindita Nikolla, e cila ka nisur t’ju përgjigjet të gjitha ankesave nga ana e studentëve.
Por sërish ka qenë Rama ai që e ka rimarrë fjalën për sqarim. Kryeministri tha se në përzgjedhje është luajtur dhe me presje dhjetore në mesatare. Si shembull ai mori kombëtaren shqiptare në Francë, e cila nuk e ka kaloi fazën pikërisht nga përllogaritjet e imëta. /tesheshi.com/
