Rama takim me sipërmarrësit: refuzoni zhapazhulët që ju vijnë për gjoba, mos lejoni çakejtë t´ju shqyejnë…(video)

Refuzoni çdokënd që ju vjen në derën e bizneseve tuaja në mënyrë të padenjë apo që ju vendos gjoba. Ishte kjo këshilla që kryeministri Edi Rama i ka dhënë sipërmarrësve gjatë një takimi të zhvilluar me ta, ku ka pohuar se në administratën shqiptare ka grabitqarë dhe parazitë, që për t’i luftuar qeveria nuk mund t’ia dalë e vetme.

“Jeni të vetëdijshëm për sa shumë grabitqarë dhe parazitë ka në administratë, ndaj ju them që këta t’i luftojmë së bashku. Qeveria mund t´i luftojë këta edhe pa ju, por do të kërkojë edhe shumë kohë dhe do të ketë shumë plagë në trupin tuaj, se ata do ju shqyejnë, çjerrin dhe dëmtojnë nëse do t´ua jepni mundësinë. Na vini në provë të drejtpërdrejtë dhe vini në provë këtë urë të re, që është ministrja e Shtetit dhe zyra e sa për mbrojtjen e sipërmarrjes”, iu drejtua Rama sipërmarrësve të mëdhenj të thirrur në një takim.

Ai u drejtoi një apel sipërmarrësve që të mos bëhen palë me anën më të errët të administratës.

“Mos u bëni palë me të korruptuarit në administratë, ngrini telefonin, merrni ministren e Shtetit, dhe mos zgjidhni rrugën që ata të tatimeve, t’ju rregullojnë bilancet e të tjera. Ata punonjës të doganave që medemek lehtësojnë proçeset mes sipërmarrësve dhe shtetit, me një tufë sekserësh të zyrtarizuar që shëmtojnë doganën e jo më të tjerat, në atë të portit të Durrësit, janë si zhapulanë”, tha Rama.

Ai kërkoi nga sipërmarrësit qe te refuzojnë çdokënd qe u vjen ne dere ne mënyrë të padenjë.

“Inspektoriatet nuk do vendosin më asnjë gjobë, deri kur të bëhet ristrukturimi i tyre. Ata janë si bandat që veprojnë gjoja në emër të mjedisit, peshqve, kullotave dhe ajrit, por që marrin vetëm lekë, i bien në qafë çdo njeriu që bën një punë, me pretekstin  se po ndot, po bën zhurmë.

Dhe bum e bum gjoba e mbigjoba. Refuzojini, nëse u vijnë veshur me bluxhins, me shqiponja me tre koka, me shapka, dhe çanta qe nuk dihet se ca kanë brenda, revole, cigare dhe bukë me vete. i nxirrni jashtë, a mos e mendoni dy herë.

Për te qeshur nuk janë ata, jeni ju dhe jam unë, që lejojmë që kjo figurë që përfaqëson shtetin vazhdon të jenë ligji në oborrin e kompanive të mëdha.

Ujku-ujku, po çakalli bën kërdinë! Jjanë një grusht njerëzish që kacafyen në Kuvend dhe në skenën politike kush është më hajdut, ndërkohë që në territor kemi një situatë që duhet ta frenojmë së bashku”, u shpreh Rama. /tesheshi.com/