Kryeministri Edi Rama ka zhvilluar një mbledhje të shpejtë me drejtues të lartë të PS-së ku është vendosur që deputetët apo zyrtarët e lartë që mund të kenë rekorde kriminale të fshehura deri tani, duhet të largohen përpara se të miratohen aktet nënligjore të zbatimit të ligjit të dekriminalizimit.
Të dyshuarit se mund të kenë problem me ligjin do të thirren këto ditë veç e veç dhe do tu thuhet që të bëjnë deklarata publike të ngjashme si me deputetin e qarkut të Lezhës, Arben Noka. Pra, një deklaratë dorëheqjeje ku do të marrin përsipër mëkatin.
Prej një muaji mësohet se organe të specializuara shqiptare në bashkëpunim me Interpolin kanë çuar për verifikim të gjithë personat që mendohen se kanë problem me ligjin. Një deputet i parlamentit shqiptar tha sot për tesheshi.com se lista e “mëkatarëve” dihet tashmë, por vetëm nga ata lart dhe ndërkombëtarët.
Tashmë çdo gjë është e qartë dhe emrat dihen nga vetë Edi Rama dhe një rreth i ngushtë i tij në Partinë Socialiste. Pikërisht kjo temë pritet të diskutohet edhe në Kongresin e Partisë Socialiste të muajit mars.
Ambasadori amerikan, Donald Lu ka zhvilluar një takim me një grup deputetësh të parlamentit shqiptar për procesin e dekriminalzimit. Pas përfundimit të takimit, deputeti socialist Taulant Balla deklaroi se draftet do të jenë gati brenda muajit mars. Balla theksoi se që të gjitha çështjet e hedhura me ligj kanë kaluar me konsensus. Në takimin me Ambasadorin Lu të pranishëm ishin edhe Oerd Bylykbashi si dhe Luan Rama. /tesheshi.com/
