Fjalimin e tij javor në FB, kryeministri Rama ia ka kushtuar politikanit gjerman që i shkaktoi kokëçarje në mesjavë me deklaratën e tij anti-qeveri për negociata të hapura vetëm në 2018-ën. Sipas shefit të qeverisë shqiptare, njerëz si Krichbaum nuk kanë çfarë t’i bëjnë Shqipërisë.
“Ata thjesht shfrytëzojnë rastin për ta përdorur edhe vendin tonë si ushqim për populizmin e tyre. Mund të shtrembërojnë hapur konstatimin e KE dhe mund të gjejnë në mediat shqiptare një akses që në vendet e tyre as nuk e imagjinojnë. Përveç një grushti hiri që i japin Saliut nuk kanë çfarë t’i bëjnë Shqipërisë. Ata flasin në titull personal, nuk kanë mandat nga askush. Shqipëria europiane nuk është një ëndërr me sy hapur e kësaj qeverie por një amanet që ne do ta çojmë në fund me reforma”, tha Rama duke shtuar se PD, me anë të bllokimit të vetingut, po tenton bllokimin e negociatave.
Kryeministri ndodhet për vizitë zyrtare në Gjermani, ku të hënën pritet të takohet me kancelaren Merkel, prej së cilës pritet të marrë një “Ok” për negociatat, simbolikisht në Festën e Pavarësisë. /tesheshi.com/
