“Që nga alpet e deri në skajin më jugor të vendit, nuk ka ndodhur kurrë si këto 25 vite që të ndërtohet në shtretër lumenjsh apo në tokë buke”. Ka qenë kjo një ndër deklarimet e kryeministrit Rama gjatë prezantimit të planit kombëtar të zhvillimit për 15 vitet e ardhshme.
Shefi i qeverisë shqiptare ka qenë tejet i ashpër në fjalën e tij kur ka folur mbi atë se çfarë ka ndodhur këto 25 vjet në Shqipëri me territorin, ose më atë që shumëkush e quan zhvillim. Ai tha se mjaft të shihen se si të parët tanë, se si dhe i kanë ndërtuar kullat apo shtëpitë, për t’u ndjerë të akuzuar për atë se ç’i kemi bërë vendit.
“Stërgjyshërit tanë, tha Rama, edhe pse teorikisht më të paditur se ne, kurrë nuk ndërtuan në shtretër lumenjsh apo tokë buke”. Sipas tij, duhet të vinte demokracia që në te marroseshim e t’i bënim gjëmën vendit.
Rama tha se ndër provat e padijes sonë kolektive është çështja e ujit. “Shqipëria është vendi i dytë në Europë me rezerva uji, por ujë nuk ka as për të pirë, as për të vaditur tokat, ndërkohë që nuk mbrohemi dot as nga uji.” /tesheshi.com/
