Kryeministri Rama ka mbledhur të tijtë, qeverinë dhe grupin parlamentar, duke jua kumtuar si sukses atë që opozita e lexon si dështim: vendimin për çeljen e negociatave mbas një viti.
“Nuk ka shqiptar me mend në kokë që mbyll sytë e veshët përballë kësaj fitoreje. Nuk humbasim 12 muaj, por kemi kohë 12 muaj për thellimin e reformave”, theksoi Rama.
Ai tentoi të bëjë një shpjegim teknik të asaj çfarë ka ndodhur, e që ka të bëjë sipas tij me aspekte burokratike.
“Data për çeljen e negociatave nuk është kurrë imediate pas rekomandimit pozitiv, por ka hapësirë kohore në mes që lidhet me konsensusin e domosdoshëm mes vendeve të Këshillit Europian”.
Rama fshikulloi opozitën për qëndrimet e saj, të cilat sipas tij kanë lënë një shije jo të mirë dhe te ndërkombarët.
“Miqtë tanë ndërkombëtarë na pyesin se si ka mundësi që opozita jonë e do me kaq pasion mosçeljen e negociatave? Si ka mundësi që bën këtë që nuk e ka bërë asnjë opozitë e vendeve të tjera? Ka mundësi sepse kjo është mundësia e vetme për këtë opozitë. Tamam si mallkim që na ka ndjekur rrugë më rrugë”, deklaroi kreu i qeverisë.
Rama e përmbylli fjalën e vet duke thëne ishte qeveria e tij që e bëri Shqipërinë vend kandidat e se po qeveria e tij do bënte të mundur çeljen e negociatave, deri në anëtarësimin përfundimtar në BE. /tesheshi.com/
