Kryeminisitri Rama avokoi vonesën e hapjes së negociatave, apo dhe ndonë “Jo” të mundshme më 18 tetor, duke thënë se ky proces nuk varet më nga Shqipëria, pasi sipas tij janë kontekstet e brendshme të disa vendeve ato që diktojnë vendimin. Si shembull, ai solli dhe vendet e rajonit, apo dhe vetë Kosovën, së cilës nuk iliberalizohen vizat edhe pse ka plotësuar kushtet që i janë vendosur.
“Deri vjet, ishin zgjedhjet evropiane, dhe ata e thonin copë, por jo para kamerave, të mbarojnë një herë zgjedhjet. Sepse a është gati apo jo Shqipëria, objektivisht e thotë Komisioni Evropian, politikisht e thonë ata që janë më lart, Këshilli Evropian, dhe këtu gjuha rrotullohet sipas interesit. Nuk kam asnjë arsye dhe prirje të them që këta që po na bien në qafë. Sepse nuk e kanë për të na rënë në qafë, ata e kanë problemin me administrimin e situatës së brendshme në vendet e tyre, dhe pastaj brenda BE-së.
Malit të Zi kanë një vit që i kanë bllokuar hapjen e një kapitulli, sepse nuk është gati. Nuk po shkojmë në një kishë apo xhami, ku e kemi rrugën të shtruar dhe janë të mirëpritur të gjithë mëkatarët. Po kërkojmë të futemi në një familje interesash të mëdha dhe situatat ku konvergjenca është tejet e vështirë, nuk bëhet me shumicë votash duhet të jenë të gjithë dakord, mjafton të thotë njëri nuk dua, dhe nuk bëhet.
Të gjithë ata që kundërshtojnë Shqipërinë, janë kundër zgjerimit. Shqipërinë e përdorin si dordolec për të trembur të tjerët për interesat e tyre politike. E dini sa kohë ka marrë Serbia pas ‘Po’-së së negociatave? 32 muaj”, theksoi Rama.
Në gjykimin e tij, Shqipëria i ka bërë detyrat e veta. “Bashkimi Evropian nuk ka sot problem plotësimin ose jo të kushteve nga Shqipëria, por ka probleme të lidhura me një periudhë të tërë krize që ka marrë të përpjetën qysh me shpërthimin e lumit të refugjatëve”, tha Rama. /tesheshi.com/
